Palusot sa bugas

Niining bahina sa akong lindog, tugoti nga hatagan na usab nakog pagtagad kining laing mga sumbong nga gipadangat kanako sa mga magbabasa. Naghulat ra ba gayod kuno sila nga mapatik dinhi sa akong column ang ilang mga reklamo mao nga seguroon gayod nako ang paghatag og pagtagad niini.

Ang una mao kining text nga nagkanayon: "Good day, Sir. Adunay palusot sa bugas nga akong nabantayan diri dapit sa Makro, sa mga bakanteng luna duol pa gyod sa karsada. Kagahapon dihay nag-parking nga trak sa bugas sinako ang sulod, gibalhin sa laing trak. Sa akong tan-aw, tinonto kini kay nganong ari man sila magbalhinay sa bugas diring dapita. Mingaw kining lugara. From Concern Citizen." -- 0915-5105865

Daghang salamat sa imong text. Wala nimo iklaro kon kanang mga bugas nga matud mo, posibleng gipalusot, commercial rice ba o NFA rice. Pero base sa imong gi-text kanako, dako ang posibilidad nga palusot gayod kana. Makapaduda tinuod ang gihimo nila. Hinuon, dili gayod kita maka-conclude hangtod nga atong masuta kon unsay matuod o lintunganay niini.

Pero uso na karon ang palusot. Basta may lig-on lang nga kontak, mosalir gayod kining maong estilo sa modus operandi. Mao nga maayong mapanid-an kini. Maayong masusi kon nganong anha man gayod sa mingaw nga lugar magbalhinay sa sinakong bugas kanang mga trak nga mo-parking diha dapit sa Makro. Uso na ra ba kining maong estilo sa modus karon. Bisan gani didto sa kaulohan may nahitabo na nga ingon niini. Mao nga angayan gayod nga masusi kini.

* * *

Laing sumbong nga nadawat sa akong lindog mao kining bahin sa City Traffic Operations Management (CITOM). Daghan kaayo ang nagbagulbol bahin sa ilang serbisyo. Usa ka Loreto Balmaceda, nagbase sa kaulohan ug mibisita sa Sugbo, nakaingon nga klarong panapi ang gihimo sa pipila ka mga sakop sa CITOM.

Karon ania na usay sumbong nga nagkanayon: "Good day, Sir. Gusto lang unta ko mopahibalo sa publiko nga magbantay gyod sa CITOM. Kanang kalit nilang pagbutang og "No Jaywalking" signs. Klaro kana nga panguwarta sa katawhan. Unsaon na lang ang walay ikabayad? Thanks and more power." -- 0921-6943553 (Oct. 12, 2005--21:08:57)

Ang akong ikasulti mao nga mosunod gayod kita sa traffic rules. Pero kon dakpon gihapon kita bisan sa atong pagsunod sa balaod -- kay pangitaan gyod kitag walay klarong violations -- dili na kana maayo. Maong dili makalikay ang CITOM sa balikas sa publiko.

Sumbong ug reklamo? Text sa 0910-8105522)