Misugmat na sab ang sakit

Nag-anam kadaghan ang mga texter dinhi ning ubos tang lindog. Usahay managsama ra ang ilang mga sumbong. Adunay nabalik-balik na. Apan aduna usay angayan subli-sublion paghisgot ug pagpahinumdom aron gayod makabantay ang tanan.

Sama niining gi-text sa cellphone number 0910-2995310. Bahin kini sa modus operandi sa mga badlongon sa katilingban nga gamiton ang usa ka bata isip instrumento sa pagpasalir sa ilang tinonto. Taudtaod nang nahilom kining maong estilo sa operasyon sukad nga ato kining gibulgar dinhi ning lindog.

Apan karon mibalik na usab ang mga badlongon sa paghimo niini. Misugmat na sab ang sakit sa mga badlongon sa katilingban. Mao nga magbantay gayod kita kanunay. Dili nato hatagan og higayon nga makahimog daotan ang mga tawo nga walay laing buhat gawas sa paghatag og kahasol sa ilang isigkatawo.

Sumala sa atong texter, misakay siyag PUJ gikan sa North Terminal padulong sa Colon. Paghunong sa PUJ nga iyang gisakyan sa may White Gold, adunay misakay nga nagdala og bata. Nikapyot lang ang maong tawo ug ang bata nga kauban niini maoy gipalingkod sa bakanteng lingkoranan.

Ang atong texter mismo ang gituparan sa bata. Samtang nagdagan ang jeep, nagkanta-kanta ug luhag kaayo ang bata. Pero sa hilom nagpahigayon na diay kini sa paglaslas sa bag sa atong texter. Sanglit nalingaw ang atong texter sa body language sa bata maong wala siya makabantay nga gilaslasan na diay ang iyang bag. Nakuha gyod niadtong higayona ang iyang kuwarta ug cellphone.

"Kon mosukol ta sa bata, ang nagkumpayot maoy moduslak nato. Ang maayong buhaton ana nila kon madakpan, butaan aron dili na makabuhat og daotan," nagkanayon ang atong texter nga klarong naglagot pag-ayo gumikan sa iyang pagkabiktima sa tinonto.

Pagbantay kamo niining maong matang sa tinonto. May mga higayon nga mahilom kining maong mga badlongon. Apan kon sa ilang paniid, dili na sila init ngadto sa mga awtoridad ug mikompiyansa na sab ang katawhan mobalik na sab sila sa pagpuwerhisyo sa katawhan. Busa usbon ko, pagbantay.!

* * *

Ipaambit ang imong kasinatian aron ang katawhan masayod. Text at 0910-8105522. E-mail: [email protected]