Sa mga eskina

Mga suki, kon kamo maglakaw sa kadalanan sa siyudad panahon sa kagabhion, likayi gayod ninyo ang mga kalye nga dili kaayo daghan ang mga tawo nga moagi. Kini tungod kay daghang mga badlongon sa katilingban nga moestambay sa maong dapit aron paghulat og tawo nga mabiktima.

Nakadawat kog daghang reklamo nga kanang dalan Legaspi, sukad sa eskina P. Burgos hangtod sa eskina Manalili, maoy usa sa mga dapit dinhi sa dakbayan sa Sugbo diin anha mag-atang ang mga badlongon sa katilingban. Iniglabay sa prospek sa ilang nahimutangan, ila kining nuntan sa pagsunod dayong deklarar og hold-ap. Ang kasagaran nilang biktimahon mao ang mga estudyanteng babaye.

Laing dapit diin mopasalir sa ilang tinonto ang mga badlongon sa katilingban mao ang Lincoln St. ug kanang kalye atubangan sa Fort San Pedro nga kon wala ako masayop, Pigafetta St man tingali kadtoy ngalan nianang kalyeha. Mao gihapon ang estilo sa modus operandi. Sipingan lang sa suspek ang prospek dayong deklarar nga hold-ap.

Laing dapit nga gireklamo mao kanang dalan D. Jakosalem, sukad sa eskina sa Legaspi hangtod ngadto sa eskina sa P. del Rosario. Maoy ipasalir sa tinonto sa mga badlongon kon mamalong na sa mga suga ang mga dagkong department store, partikular na ang Gaisano Main. Kon mamalong na gani sa mga suga ang maong establisamento, molihok na usab ang mga badlongon sa katilingban.

Nakadawat sab kog text nga diha sa V. Rama Avenue, sukad sa eskina sa may N. Bacalso Avenue hangtod sa P. del Rosario Ext., naa usay mga badlongon diha nga mangatang sa mga tawo nga maglakaw panahon sa kagabhion. Labaw nang daghan ang nagsumbong kanako mahitungod nianang usa ka lalaki nga mangatang diha sa dalan Sanciangko, dapit sa may eskina sa Panganiban. Makugang ka na lang kay samtang ikaw maglakaw may tawo man nga mokalit pag-ali sa imong agianan. Hold-aper na diay kadto. Pastilan...!

Duna sab ganiy nagsumbong nako nga diha sa P. Gomez St. anaa usay mangatang usahay diha sa mga tawong maglakaw panahon sa kagabhion. Mao nga pagbantay kamo niining mga lugara. Dili kalikayan usahay sa atong pagbagdoy nga mahitukboy kita sa maong mga lugar busa kinahanglang magbantay kita kanunay ilabi na karon nga nasayod na kita nga may mga badlongon sa katilingban nga mangatang nianang dapita. Dili gyod magkompiyansa. Kon may malabyan kamong tawo nga naglingkod o kaha nagtindog sa daplin sa dalan unya mokalit lang pagsunod sa inyong paghisaylo sa iyang nahimutangan, pagbantay kay basin daotan siyag tuyo.

Sumbong ug reklamo? Text sa 0910-8105522)