Hugaw gyud diay!

Wala gyoy laing napasanginlan si kanhi Comelec Commissioner Virgilio Garcillano sa iyang pagkasikat karon kun dili ang mga lider sa oposisyon.

Wala siyay laing mabatbat nga ngalan sa dihang gihinabi sa usa ka reporter sa dako nga television network sa nasud kun dili ang ngalan ni Senador Panfilo Lacson.

Gipasanginlan sa kontrobersiyal nga komisyoner sa Comelec ang senador nga maoy utok sa kampanya aron maposasan gyud siya, moatubang sa imbestigasyon sa mga magbabalaod, ug maduot og samot si Presidente Gloria Macapagal-Arroyo.

Mao kini ang rason nga bisan unsa ka risgo sa iyang kinabuhi, nangahas siya pagpa-interbiyu sa TV network.

Gisangkad ni Garcillano ang Mindanao aron pakigkitaan ang mga election officers sa nagkadaiyang mga lungsod ug gipaluwat niya og mga affidavit aron i-deny ang nabaniog nga panikas sa 2004 nga election ug nakapahimong pagya sa "Hello Garci" tape.

* * *

PLANO. Ang sitwasyon tali sa administrasyon ug oposisyon daw mga bata nga nagdula og tago-tago.

Samtang ang administrasyon naninguhang mapahilom si Garcillano o ba kaha mauli ang pagsalig sa katawhan ngadto kaniya isip komisyoner sa unta-tinamod nga ahensiya sa gobyerno pinaagi sa pag-esplikar sa publiko unsay nahitabo sa 2004 election, walay puas ang oposisyon paghimo og mga pamaagi paglumpag sa administrasyon pinaagi sa pagduot sa komisyoner sa maong isyu.

Kun si Lacson maoy tinubdan sa 'logistics' aron mapakusgan ang ilang kampanya batok sa kasamtangang gobyerno sa nasud, aduna usab sila sa oposisyon kanang gitawag og "tigtug-an" asa si Garcillano, unsay iyang gibuhat, ug unsay iyang kalihukan.

Si kanhi Senador Francisco Tatad maoy tawong walay puas sa pag-monitor sa kalihukan ni Garcillano. Walay laing mapasangil nga hinungdan sa iyang pagka-ingon niana gawas sa iyang pagka-oposisyon, ug sa iyang pagka-die hard ngadto ni kanhi Pres. Joseph Estrada.

* * *

TIKAS. Pero taym pa!

Samtang wala na malilong sa katawhan ang kalambigitan sa administrasyon, ilabi na ni Pres. Arroyo mismo sa Hello Garci taped conversation, si Garcillano mismo ang miingon nga dili lang kay ang mga kandidato sa administrasyon ang nanawag kaniya atol sa inihapay sa balota niadtong 2004 election.

Si Garcillano mitataw man nga mismo ang mga kandidato sa oposisyon nanawag man kaniya aron "iseguro" ang ilang mga botos.

Sa ato pa, parehas lang sad-an ang administrasyon ug oposisyon.

Usa ra gyud ang akong "conclusion" sa 2004 election, kun basehan nato ang pangangkon ni Garcillano: hugaw ang miaging presidential election.

* * *

CUSTOMS. Mitiyabaw na si Cebu Customs District Collector Ma. Lourdes Mangaoang sa pagkalunod sa koleksiyon sa iyang puwerto.

Gibasol niya kini sa walay undang nga kagubot sa politika sa kauluhan.

Matud niya nga tungod sa panagbangi sa mga lider sa politika sa nasud, ang mga negosyante nagmahadlukon na pagbubo sa ilang puhonan.

Ang resulta niminus ang importasyon.

Kay niminus man ang importasyon, mikunhod usab ang koleksiyon sa adwana gikan sa duties and taxes sa mga imported nga mga kargamento.

Dili lang kay ang Port of Cebu ang nag-ilaid sa koleksiyon, daghang mga puwerto sa nasud nga hapit wala na gani barko nga nangabot tungod kay walay importer nga nagpaabot dinhi sa ilang mga kargamento.

Apan, ang makalingkod nga collector sa Port of Cebu mabalaka gayod sa pagkunhod sa koleksiyon tungod giisip man kini nga premier port gawas sa Port of Manila (POM) ug Manila International Container Port (MICP).

Sa ato pa bisan unsa ka krisis, duna gyud untay maayong koleksiyon ang Cebu.

Gani, gituohan man sa kadaghanan nga bisan unsa ka krisis sa ekonomiya, ang Cebu makit-an lang gihapong magginhawa taliwala sa kalisod. Sa ato pa, mabulokon lang gihapon ang pamatigayon dinhi.

Mao nga dinhi kita mabalaka. Makita na gyud nato nga natarog na ang Cebu sa krisis sa ekonomiya mugna sa kagubot sa politika sa nasud.