Klaroha unsay gusto

Hain naman ang panghambog sa Napocor ug Transco nga wala nay brown-out nga mahitabo sa Metro Cebu tungod sa Cebu-Negros-Panay interconnection?

Makaduda na kaayo ang sunodsunod nga panghulga sa Cebu Private Power Corporation (CPPC) ug Visayan Electric Company (VECO) nga adunay pag-brownout nga mahitabo sa mosunod nga mga adlaw tungod kay ang CPPC mo-undang na og suplay sa 62 megawatt nga kuryente ngadto sa Veco.

Pustaan pa, ang panapos niini mga estorya nga nanggawas sa media: "usbaw sa presyo sa kuryente."

Hasta na si Mayor Tomas Osmeña nailad sa moro-moro sa mga power players. Miluwat na siya'g pamahayag nga uyon siyang usbawan na lang ang ipaningil nga bayranan sa kuryente kay sa magsige kita og kahapla tungod sa brown out.

Mas maayong ipaklaro na lang sa CPPC ug Veco nga gusto silang maningil og usbaw kay sa hudlat-hudlaton pa kitang mga kunsomedor og brown out.

Wala ra ba dayon silay laing ipasangil, alkanse! Bisan pakyas sila pagladlad sa publiko giunsa nila pagka-alkanse.

* * *

PRESYO. Makadadayeg kining paningkamot sa kagamhanan sa dakbayan sa Sugbo nga dili mapahimuslan ang mga kunsomedor sa mga negosyante nunot niining pagpatuman sa expanded value added tax (e-VAT).

Billboard nga gilistahan sa mga tindahan nga nagbaligya og barato nga presyo sa nag-unang palaliton gibutang sa Fuente Osmeña, duol sa Fuente Police Station.

Lain pang mga billboard sa samang katuyoan ang nahunahunaang ibutang sa North ug South Bus Terminal, Plaza Independencia ug Citilink Terminal.

Samtang makadadayeg ang katuyoan sa dakbayan, adunay nakasaway sa lugar asa nila ibutang ang mga price billboards.

Listahan man kaha sa mga tindahan nga nagbaligya og labing baratong baligya, nganong anha man sa Fuente, sa plaza ug mga bus terminals?

Ang maayo unta, adto ibutang sa mga merkado ang mga billboards. Maka-silbe pa kini sa tinuoray nga katuyoan.

Ang mga pasahero sa bus magdalidali og kawas sa terminal tungod sa ilang mga tuyo dinhi sa dakbayan, ug kun mamauli magdali aron dili mabiyaan sa bus. Lisud nang makalili bisan usa ka segundo sa unsay isulat sa billboards.

Sa Plaza Independencia, mga maid ug boy maoy kasagarang makalili sa billboards tungod kay gihimo kini nilang abtanan matag Sabado ug Domingo. Hinuon, pipila kanila tahasan sa ilang mga amo sa pagpangompra.

Apan, ngano gyud nga anha sa Fuente, North ug South Bus Terminals ug Citilink? Walay gagong mangomprahay sa Carbon ug Taboan nga motuyo og adto sa maong mga lugar aron molili sa billboards.

* * *

PEKE. Mga 70 na ka pekeng business permit ang nasakpan sa Revenue Monitoring Task Force sa Cebu City Hall.

Nagpakita lamang kini nga bisan unsa ka-isog sa mayor sa siyudad, aduna gihapoy mga panikas, pangurakot ug pamulsa sa kuwarta sa gobyerno nga manghitabo.

Hain naman ang gipanghambog ni Mayor Tomas Osmeña nga maayong "management" nga matud niya mas lamang niya kay ni kanhi Mayor Alvin Garcia?

Nganong midaghan man ang reported nga pameke sa city hall sa karon nga termino ni Tomas?

Na hala! Ibutang nato nga mao kana ang gidaghanon.

Siyempre, aduna gyuy sindikato nga naglihok diha sa City Hall nga maoy utok nianang pameke sa business permit ug uban pang mga dokumento nga lukaton sa balay lungsod.

Apan, hain naman ang mga ngalan nianang mga utok sa sindikato sa pameke?

Nganong wala pa man gyuy usa nga gihinganlan?

Tungod ba kay supporters ni Tomas sa miaging eleksiyon?