Wala nay epek

Nindot ang sugyot ni Konsehal Arsenio Pacaña nga angay'ng magtudlo gayod og lugar diha sa matag barangay aron adto ipabuto ang mga rebentador.

Apan sangod og kini mapatuman. Akong gihimoan og pagpanuki-duki, nahibaw-an nako nga ang dakbayan sa Sugbo dunay ordinansa 222.

Naglatid kini nga ang pagpabuto og mga rebentador adto lang pagahimoa sa mga hawan nga dapit. Sa ato pa, dili kini mahimong pabuthon diha sa mga aseras ug mga dapit nga daghang kabalayan.

Ang city ordinance 222 gihimo kaniadto pang Enero 9, 1957. Apan gitan-aw nako ang rekord sa kapolisan, wala gani'y bisan usa kabuok nga nadakpan sa paglapas sa maong ordinansa.

Gimugna kining maong ordinansa dihang ang mayor sa dakbayan sa Sugbo kaniadto mao pa si Serging Osmeña Jr., amahan ni mayor Tomas Osmeña.

Gilatid sa maong ordinansa nga ang pagpabuto og rebentador, adto lang himoa sa bakante nga luna - labing minus 50 metros gikan sa kabalayan ug 100 ka metros gikan sa mga gasoline stations ug ubang dapit nga pundohanan sa mga dali ra masunog.

Kadtong mga tawo nga gustong magpahigayon og mga fireworks sa mga dapit nga wala masubay sa lagda, giawhag nga mokuha og permiso gikan sa opisina sa mayor.

Apan mao lagi. Kaniadto, P200 ra ang multa. Apan daku na kaayo ang maong kantidad niadtong tuiga. Nakaingon ko nga wala g'yoy kapuslanan kini kay hapit na ang pasko.

Ingon man, lahi na kaayo ang batasan sa katawhan karong panahona, dili sama kaniadto nga sagad sa mga tawo matinahuron.

Maayo ang tumong ni konsehal Pacaña kay aron kini nga malikayan ang mga aksidente, sama nga adunay mabuthan sa pagpataka og pabuto sa mga rebentador ug malikayan usab ang pagkamugna og sunog.

* * *

Ang mga tinugyanan sa tugpahanan sa abyon ug dunggoanan sa mga barko giawhag karon nga bantayan pag-ayo ang pagpalusot og mga isda nga piranha gikan sa laing kanasuran.

Si konsehal Nestor Archival, chairman sa committee on environment diha sa konseho sa dakbayan sa Sugbo, nakabantay nga dili imposible nga dunay makapalusot niining maong matang sa isda diha sa airport ug seaports.

Kuyaw kaayo kon dunay magbinuang nga magdala og piranha dinhi gikan sa laing nasud, unya buhian diha sa mga sapa, o didto sa mga kaligoanan samaa sa mga tubod ug linaw, kalit lang ta'g siyagit kon mapaakan.

Haita ra bas ngipon niining maong isdaa. Ang isda nga piranha, usa ka gamay'ng isda apan hait kaayo og mga ngipon. Wala kini itugot dinhi sa nasud tungod kay peligro kini nga makapaak.

Ang hait kaayong mga ngipon sa maong isda maoy mikunis-kunis sa mga mananap, sama sa tawo nga ilang tabangan sa pagpaak.

Wala pa g'yod hinooy nakonpirmar nga report nga dunay nakapayuhot og mga isdang piranha dinhi sa Sugbo.

Ang maong matang sa isda sagad nga makit-an didto South America nga sagad anha mabuhi sa mga tab-ang nga tubig, ug mahimo gani nga mabuhi diha sa mga aquarium.

Ang Fisheries Administrative Order 126 naglatid og silot nga hangtud sa P5,000 ug pagkabilanggo ngadto sa upat ka tuig sa mga masakpan nga molapas sa maong pagdili.

Gilatid sa lagda nga kadtong mga isda nga piranha nga masakpan nga ipayuhot dinhi sa Pilipinas sakmiton sa kagamhanan og patyon.