Masanagon ba ang Pasko sa mga kawani sa Talisay?

Tapos na ang kalag-kalag og pipila na lang ka adlaw gikan karon, magsaulog na usab kita sa Pasko.

Ang Pasko maoy pinakamasadya ug pinakabibong okasyon nga natali sa atong kalendaryo tungod kay ang atong palibot dayan-dayanan sa nagkadaiyang matang sa mga christmas lights and decors.

Daghan kaayong mga piging ug salo-salo ang pagahimuon atol ning okasyona. Mga kaigsoonan natong adunahan ug mga kabus mangita gyud ug pamaagi aron lang malipay sa Pasko.

Daghan usab sa atong mga kaigsuonan didto sa gawas sa atong nasud mopauli lang og tuyo dinhi sa ato aron makig-uban sa minahal nila sa kinabuhi atol sa Pasko.

Nganong magsadya ug magmaya man kitang mga katawhan ning higayona? Ang tubag niini tungod kay ang giila natong Mesiya nga si Hesu Kristo natawo man sa Disyembre 25 kon Pasko.

Gumikan niini, ang atong balaud nagalatid nga sa kada Pasko ang mga empleyado ug kawani sa pribadong kompaniya makadawat gyud ug 13th month pay kon bonus.

Ug ang Civil Service Law usab nagamando nga ang mga kawani ug empleyado sa gobiyerno makadawat usab og 13th month pay ug christmas gift nga P5,000.

Maayo na unta kining mga nahisgotang kaayohan sa atong palibot karon kay sa wala gayud apan naunsa mang pagkaunsaa nga nag-ilaid man gihapon ang atong mga kawani ug mga empleyado lakip ang ilang pamilya sa hilabihang pagsulbong sa mga presyo sa mga palaliton, plitehan, eskwelahan ug uban pa.

Ilabi na gyud sa mga kawani sa gobiyerno nga wala gyuy usbaw-usbaw ang iang suweldo sukad pa sa paglingkod ni Presidente Gloria Macapagal-Arroyo kaniadtong Enero 20, 2001 hangtod karon.

Maayo pa ang mga kawani sa Talisay city kay naningkamot karon si Mayor Soc Fernandez sa paghatag kanila og "extra-bonus" ug P1,500 rice and grocery allowance matag-bulan. Busa, makaingon kita nga masanagon ug mabulokon kaayo ang Pasko sa mga kawani sa Talisay city hall ug Mabuhay si Mayor Soc Fernandez!