Gwardya nagtanga

Dunay binilanggo sa Bagong Buhay Rehabilitation Center (BBRC) nga nakalayas kagahapon sa buntag samtang mitambong og husay sa iyang kaso didto sa hukmanan.

Kon imong huna-hunaon, sad-an g'yod ang gwardya nga nalayasan sa binilanggo kay wala man niya ayoha ang pagbantay og misangpot kini nga ang usa ka priso nga iyang gibantayan - nakalayas.

Apan maayong tan-awon usab ang aspeto sa kakuwang og mga gwardya, nga ang usa ka gwardya mobantay og usahay kapin sa napulo ka priso, makaingon ka nga dili usab maisip nga pakasad-on na lang ang mga gwardya.

Kining maong sitwasyon makita nimo diha sa mga drug courts diin ang mga binilanggo lambigiton na lang pagposas aron nga masayon ra ang pagbantay sa gwardya.Apan hinoon, makakita g'yod hinoon ko og talan-awon nga dunay pipila ka gwardya nga nagpabaya lang usab sa ilang pagbantay.

Ang usa ka igmat nga gwardya kanunay'ng nagpunting sa ilang mga mata ngadto sa ilang gibantayan. Apan ang ubang gwardya talikdan man ang mga priso.

Pananglit ang priso naglinya nga naglingkod sa kilid hangtud sa luyo, ang gwardya usahay anha man molingkod dapit sa atubangan. Sa ato pa, dili siya makakita kon dunay priso nga tunolan og yawe sa posas.

Ang trabaho sa usa ka gwardya, mao ang pagbantay nga ang priso nga iyang gibantayan - dili makaeskapo. Dili na kinahanglan nga maminaw pa siya sa proceedings sa husay.

Kon magpabaya sila, sayon ra sa usa ka priso ang pagtang-tang sa iyang posas unya mag-ilis sa iyang sapot.

May mga higayon nga makita nako nga ang gwardya dili lang magtagad kon ang mga kabanay sa priso moduol sa mga binilanggo. Angay nila nga tutokan kanunay kay basin og dunay itunol ngadto sa mga priso.

Ako kining gituki ang maong isyu aron ang kadagkoan sa mga bilanggoan masayod sa binuhatan sa ilang mga gwardya, og nga sulbaron nila ang kakuwang sa ilang mga jailguards.

Sa kaso nga pagka-eskapo ni Arnold Abellana kagahapon, mora'g maglisud og panubag si SJ02 Panfilo Aligato. Usa ra ka priso ang iyang gibantayan apan napugahan lang gihapon.

Ambot kon giunsa niya pagbantay. Ako'y magbantay og priso, sangod og makalayas. Dili g'yod mokompyansa, ayaw hatagi og higayon nga makalayas. Posas g'yod pirmi.

Ang priso nga si Abellana may kalaki g'yod. Napasakaan kini og kaso nga illegal possession of firearms, apan na-dismiss lang ang kaso.

Karon, napasakaan siya og drug-related case nga maoy pending diha sa hukmanan. Pagtambong niya og husay kagahapon sa buntag, malampuson siya nga milayas.

* * *

Wala ko makapugong sa pag-agik-ik tungod kay gisugyot ni mayor Tomas Osmeña nga kon ang Visayan Electric Company mopatuman og selected brown outs, adto kini himoa sa Talisay.

Ang rason sa mayor mao nga dinhi sa dakbayan dunay ipahigayon nga mga duwa sa 23rd Sea Games. Husto man si mayor Osmeña nga kinahanglan nga ang dakbayan malikay sa mga brown outs, apan magkatawa ko kay Talisay maoy iyang madali.

He! He! He! Wala pa g'yod mawala sa pangisip ni mayor Osmeña ang kasuko sa mga opisyal sa Talisay tungod sa ilang tinguha nga moangkon og kabahin sa South Reclamation Project.