Muro-muro sa VECO ug CPPC

Hain naman ang gipasiatab ni Allan Ortiz sa Transco nga ang multi-million Leyte-Cebu Interconnection Uprating Project maoy tubag sa suliran sa kakuwang sa kuryente sa Sugbo.

Nganong gikugang kugangan ang atong mga opisyal nga masinati sa Sugbo ang kakuwang sa supply sa kuryente kon mohunong sa ilang operasyon ang Cebu Private Power Corporation, usa sa mga Independent Power Producers nga nagsupply sa Visayan Electric Company, karong umaabot Sabado.

Di ba diay igo nga makasapar ang supply sa kuryente gikan sa Tongonan Leyte nga gikuha pinaagi sa Transco? Atol sa briefing ni Ortiz kaniadto samtang gihimo pa ang LCIUP pwerti niyang nakapagarpar nga ang maong proyekto maoy tubag sa suliran sa kuryente. Hain naman ang gipanghambog ni Ortiz?

Tinuod kaha nga magkuwang gyud ang atong supply sa kuryente og mohunong ang CPPC sa ilang operasyon o gikondisyon lang tang daan sa mga players sa kuryente alang sa gipaabot nga pagpa-usbaw nila sa bili sa kuryente?

Niadtong miaging semana ang National Power Corporation misang-at na og petition pagpangayo og usbaw sa kuryente, dili kaha nga mao na ni'y epekto sa maong petition? Nahadlok ko nga kabahin ni sa lapad nilang drama aron pag-justify sa dugang bayranan sa kuryente.

Apan kon kinsa may direktor sa maong drama, murag angayan niyang pilpilon ang VECO ug CPPC kay murag wa maayo og dala ang ilang papel. Wa magtugma ang dialogue sa VECO ug CPPC tungod kay samtang ang CPPC namasangil nga wa motuman ang VECO sa ilang gipangayong negosasyon alang sa extension sa ilang interim agreement ang VECO sab miingon nga abli silang kanunay alang sa maong negosasyon.

Kinsa may nagsulti nila karon sa tinuod? Namatikdan hinuon nako nga dunay inconsistency sa pamahayag sa CPPC tungod kay samtang sila namasangil nga wa sila tagda sa VECO ang general manager sa CPPC nga si Roger Lim mitug-an nakong dunay on going negotiation sa iyang mga labaw ug sa mga dagkong opisyal sa VECO. Unsa man gyuy tinuod?

Ang VECO sa ilang bahin daling nakakita og rason pinaagi sa paggamit sa mga inosenteng konsumidor isip taming tungod kay matud nila ang gusto sa CPPC nga mahitabo dili makaayo sa mga konsumidor. Nindot, paminawon unsa? Pero kanus-a pa man ang VECO naghuna huna sa mga konsumidor nga tanang gasto nila sa pag apod apod sa kuryente ila mang gipasa sa nabuktot nang publiko.

Nganong di na man lang sab angkunon sa VECO nga duna silay personal nga interest niining maong problema tungod kay ilang tinguha nga hingpit na gyud nga mo take over sa operasyon sa CPPC.

Ang CCCI ug ang mga local government units hinuon naningkamot na nga mopatunga sa maong problema, hinaot lang nga duna kini'y padulngan tungod kay ang posibling mahitabo niini nga mag-agwanta gyud ang publiko og mahal nga kuryente kon mapugos ang National Power Corporation pagpadagan og balik sa ilang mga diesel plants.