Nailad sa masyaw

Hangtud karon daghan pa gihapon ang nabuang sa masyaw diha sa kalungsuran, ug aduna sa'y pipila dinhi sa dakbayan.

Nasuta nako kini tungod kay kaniadtong Miyerkules sa gabii, nakadawat ko og text message gikan sa usa nako ka ig-agaw nga nagpuyo sa San Remigio, usa ka amihanang lungsod dinhi sa Sugbo.

Gihangyo ko nga papaliton og numero sa masyaw, bali kuno og 200 ka units kay wala na siya makapalit didto sa ilang lungsod. Ang numero kuno nga ipapalit nako 10-9-7 tungod kay "gihatag" kuno kini sa usa ka radio announcer sa usa ka radio station dinhi sa dakbayan.

Nangutana ko sa akong higala kon unsay buot ipasabot sa 200 units, bali diay kuno og P50, ambot og gitug-anan ba sab kaha ko sa husto.

Bisan og nakaila ko sa masyaw usher sa barangay Lorega-San Miguel, apan wala ko mopalit sa numero nga iyang buot ipapalit nako. Wala ko motoo sa iyang giingon nga makadaug ang maong numero nga giingong gihatag sa radio announcer.

Akong gihuna-huna nga kon tinuod nga makadaug ang numero, ako lang ingnon nga wala na nako makit-i ang tigbaligya og masyaw tickets. Pagka-ugma akong nasayran nga lahi ang "gipadaug" nga numero sa masyaw.

Pagkasunod adlaw, wala gihapon. Wala ba kamo mahibulong kon nganong gi-enclose nako og quotation marks ang pulong "gipadaug?" Tungod kana kay ang mga numero nga mogawas sa masyaw matag adlaw, himo-himo lang sa mga tigpasiugda og dili tinuoray nga resulta basi sa duwa.

Sa wala pa ko mosugod sa pagsuwat niining maong lindog, gikontak nako ang akong mga tigpaniid didto sa Bogo ug San Remigio. Daghan ko'g kontak didto kay lumad ako nga nagpuyo sa maong dapit.

Nasuta nako nga naghitak gihapon ang sugal nga masyaw sa amihanang Sugbo. Ang nakapadugang sa kadasig sa mga tawo nga namusta og masyaw mao kay duna kuno'y magsisibya sa radyo nga "nanghatag"og numero.

Sa gihapon gi-enclose nako sa quotation marks ang pulong "nanghatag" tungod kay ang tinuod, gibaligya ang maong mga numero.

Ayaw kamo patonto sa binuang niining ubang mga magsisibya ingon man sa mga tawo nga nagpatoo nga konektado sila og radyo.

Aw hinuon dili bakak ang ilang giingon nga masayod sila sa mga numero nga mogawas nga mananaug sa masyaw kon suod nila ang mga tigpasiugda sa maong illegal nga sugal.

Sa ako nang giingon, buhat-buhat ra ang mga numero nga padag-on kunohay matag adlaw. Gipili ra sa mga tigpasiugda sa maong illegal nga sugal kadtong numero nga gamay ra'g pusta maoy padag-on aron sigurado ang ilang ganansya.

Ang pipila ka magsisibya sa radyo nga kusog kaayong magsigi og sing-al sa ilang programa sa kaadlawon sa mga "tip" kunohay sa modaug nga numero, mga kakonsabo sila sa mga tigpasiugda.

Ambot, wala man g'yod masumpo kining maong binuang. Sa tinuod lang, kuwang ko og pagtahud sa Kapisanan ng mga Brodkaster sa Pilipinas (KBP) kay ang mga opisyal niini dili man makasumpo sa mga magsisibya sa iyang mga member-stations nga nagdasig og masyaw.

Mga utokan ang mga opisyal sa KBP, apan daw sa wala sila'y utok kon ang isyu na sa masyaw maoy hisgotan. Dili na lang nako batbaton pa ang lagda sa Radio Code.

Kon gihimo pa sa kapolisan ingon man sa kadagkoan sa KBP ang tukma nilang gimbuhaton, sigurado nga dugay ra nga napitol kining masyaw nga mikuyanap na paag-ayo dinhi sa Sugbo ug ubang bahin sa nasud.