Direct hiring kuno

Karong panahona daghan kaayo ang nangandoy nga makatrabaho sa gawas sa nasud. Lisod na man god kaayo karong puy-an ang Pilipinas. Mahal ang bili sa mga palaliton ug gamay ra ang suweldo, maglisod na sa pagkaon ang mga tawo katulo sa usa ka adlaw. Mao nga daghan ang nangandoy nga mo-abroad.

Tungod niini, misiaw usab ang mga badlongon sa katilingban nga maoy paboritong biktimahon kadtong mga tawo nga gustong mo-abroad. Lainlain lang ang modus operandi sa mga mangingilad aron makabiktima sa ilang isigkaingon nga gustong mo-abroad. Imbes makatabang sila, nagdugang na hinuon sila og problema ngadto sa tawo nga gustong manimpalad sa langyaw'ng lapyahan.

Ang estilo sa maong mga badlongon sa katilingban mao nga maniid ug maghimo silag pakisusi sa usa ka partikular nga dapit kon kinsa ang pamilya sa maong dapit nga may sakop sa pamilya nga nanarbaho sa gawas sa nasud. Magpakisusi sila kon asa nga nasud si Pulana o si Pulano nanarbaho.

Human niini, magpakisusi na usab sila kon kinsa ang posible nilang mahimong prospect sa maong lugar. Kuhaon nila ang mga ngalan sa maong mga prospect. Dangtan og pipila ka semana, may madawat nga sulat o notisya ang maong mga prospect gikan sa 'taga ila" nga atua manarbaho sa gawas sa nasud.

Ang unod sa sulat nadetalye nga adunay recruitment agency nga nagtanyag og direct hiring ug sanglit siya man ang nasuheto sa ilang lugar, siya ang gipapadala og notisya ngadto kanila. Segurado kuno ang trabaho, makalarga dayon kay adunay motabang didto sa Manila. Dako pa ang suweldo.

Aron (kuno) nga makadawat og kontrata, kinahanglang magpadala siyag kuwarta pinaagi sa money transfer o sa bisan unsa nga padad-anan og kuwarta nga dali rang moabot. Dako ang pangayoon nga kantidad. Labing ubos ang P20,000 ug labing dako ang P100,000. Kon makahatag (kuno) ang prospect sa maong kantidad, padad-an siya dayon og kontrata.

Apan human sila makadawat sa maong kantidad, dili na gayod magpadala kanilag bisan unsang notisya ang nagpadala kanilag sulat. Wala lang silay kasayoran nga ang ngalan sa ilang katagilungsod nga mao kunohay sender sa sulat gigamit lang sa mga badlongon sa katilingban aron dali silang motuo ug sayon nga mailad.

Sa laktod, gigamit lang sa mga mangingilad ang ngalan niadtong usa ka tawo nga naka-abroad alang sa ilang modus operandi. Nga kunohay maoy nagpadala sa sulat.

Sumbong ug reklamo? Text sa 0910-8105522)