Ketabu bantayanan

Mga suki, nakadungog na ba kamo mahitungod niining "ketabu? Mao kini ang labing bag-ong recipe sa ginadiling drogas nga mas deadly pa ang epekto kay sa mikaylap na karon pag-ayo nga shabu. Gikabalak-an nga mikaylap na usab ang ketabu dinhi sa atong nasod gumikan sa pino kaayong modus operandi sa sindikatong nagpaluyo niini.

Matud pa sa Anti-Illegal Drugs Special Operations Task Force commander nga si Deputy Director General Ricardo de Leon didto sa kaulohan nga ang maong matang sa drogas mao ang formula sa gisagol nga shabu ug ketamine mao nga kusog kaayo ang epekto niini.

Nadiskubre kining maong matang sa drogas sa dihang naghimo og operasyon ang mga tinugyanan sa balaod sa usa ka drug laboratory sa Quezon City diin ilang nakuha ang daghang mga pakete sa shabu nga may sagol nga ketamine. Nagtuo ang mga awtoridad nga daghan na sa maong mga drogas ang gikapayuhot na sa lainlaing lugar dinhi sa atong nasod. Posibleng makaabot kini dinhi sa Sugbo. Pagbantay kamo.

* * *

Sa laing bahin, bantayanan kaayo kining grupo sa mga hold-aper nga maoy paboritong biktimahon ang mga pawnshop ug money changer. Ang estilo sa ilang modus operandi mao nga sulod sa usa ka bulan ilang panid-an ang pawnshop o money changer nga buot nilang biktimahon. Mangita silag bisan unsa lang nga paagi nga makapaduol sila sa maong pawnshop o money changer aron ilang maestudyohan kon unsaon kini pag-atake.

Usahay mopasumangil sila nga magprenda ug alahas. Kon money changer ang ilang birahan, mangita silag kapuy-an sa duol niini aron ila kining mapanid-an pag-ayo. Unya kon mahan-ay na nila ang ilang mga plano, ila nang atakehon ang ilang prospect kon makakita na silag tukmang tayming. Pagbantay kamo niini.

Sumbong ug reklamo? Text sa 0910-8105522)