Smuggling sa mga Christmas lights

Gialerto ni Customs commissioner Alexander Arevalo ang district collector dinhi sa Sugbo sa gipaabot nga pagsaka sa mga kaso sa smuggling nunot sa naghinangat nga pasko. Si Arevalo nga dinhi sa Sugbo atol sa tigom sa mga director general sa customs sa Association of South East Asian Nations nagkanayon nga ila nang gipaabot ang pagsaka sa smuggling sa mga substandard Christmas lights ug mga duwaan gikan sa China karong panahona.

Tukma ang pahimangno ni Arevalo ug angayan kining tutokan sa mga opisyal sa customs dinhi sa Sugbo nga gipangulohan ni Atty. Lourdes Mangaoang.

Siguradong ang mga mapahimuslanong mga negosyante mohimo gyud sa pagpayuhot niini tungod sa gipaabot nga maayong income karong panahona. Tungod sa kalisud sa panahon karon di kalikayan nga ang mga tawo mamili og barato bisan kon kini piligroso.

Busa kon dili kapugngan ang pagpayuhot niini dili lang maalkansi ang gobyerno ug ang lihitimong mga negosyante namiligro pud ang kinabuhi ug propriedad sa katawhan tungod kay ang mga substandard nga mga Christmas lights maoy sagad hinungdan sa sunog.

Ang minos nga klase sa insulator sa wire nga gigamit sa mga baratohon nga series lights maoy hinungdan sa sunog tungod kay dali ra man kining malanay hilabi pa kon tibuok gabii kining magsiga.

Di kalikayan nga bisan sa kapeligro ang mga kabus mapugos nalang sa pagpalit niini tungod kay buot mosunod sa tradisyon natong mga Pilipino nga matag pasko duna gyuy simbolo nga ibutang diha sa mga pinuy-anan tungod sa pagtuo nga maghatag kini og dugang grasya ug kaabunda. Gani bisan barong-barong duna gyuy series lights.

Apan inay nga sundon ang pahimangno, si district collector Lourdes Mangaoang miingon nga way smuggling sa series lights sa Sugbo. Gani matud niya nga way nangabot nga shipment niini gikan sa gawas sa nasud.

Motoo mo? Unsaon pag-esplikar ni Mangaoang ang nagbaha nga mga substandard nga mga series lights diha sa asiras ug bisan na gani sa dagkong mga tindahan dinhi sa dakbayan? Wa sab siguro na molupad ang maong mga baligya dinhi sa Sugbo nga wa moagi sa pwerto?

Unsa ray seguro niini, dunay mga opisyal ug kawani sa customs nga nakakwarta hinungdan nga wa mabantayi ang pagsulod sa maong mga butang. Kon wa masayod si Mangaoang niini, nagmata siya'g buntag.