Gilungkab ang sakyanan

Niining tungora akong hatagan og luna dinhi sa akong lindog kining text gikan sa usa ka magbabasa nga mihangyo nga dili lang ibutyag ang iyang cellphone number. Ang iyang text akong nadawat niadtong September 13, 2005 sa oras nga 07:26:24.

Ang iyang text nagkanayon: "Sir, maayong adlaw. Mangayo unta ko nimo og opinyon. Gilungkab ang among sakyanan ug gikawat ang car stereo ug uban pa. Kini nahitabo sa parking lot sa Perpetual Succuor Hospital between IPM and 3PM. Ang sakyanan gi-parking atbang sa ilang Specialty Bldg diin may guard nga nagposte, gawas pa sa ilang roving guard. Pero wa manubag ang hospital admin. Gi-follow-up namo sa Probe Security Agency nga maoy agency sa ilang mga guard pero a certain master sergeant Henogin (di ko segurado sa spelling sa apelyido) naestorya namo ug niingon nga dili daw sila mobayad kay dili man kuno trabaho nila ang pagbantay sa among sakyanan. Nakabantay ko nga kaming gikawatan mao pay gipakasala. Nahibaw-an namo nga ang gi-report sa guard didto sa ilang office lahi nga estorya. Sa ato pa nga kay di man manubag ang Probe ug Perpetual, ilubong na lang namo sa kalimot ang nahitabo? Palihog ayaw i-publish ang akong number."

Sa akong nasayran, adunay mga kompaniya ug ubang establisamento nga gisakop nila sa pagpabantay sa ilang mga guwardiya ang mga sakyanan sa ilang mga kliyente. Apan aduna usay mga establisamento nga dili manginlabot sa mawagtang o maguba nga mga butang sa ilang mga kliyente ug ang guwardiya walay tulobagon niini. Hinuon, may mga establisamento usab nga mohimog lakang batok sa mga guwardiya kon may moreklamong kliyente. Mao usab ang ubang mga agency. Pero aduna usay ubang ahensiya nga molaktod sa pagpanghunaw sa mga hitabo nga ingon niini. Ambot, dili ko makaseguro kon unsa gyoy husto. Depende tingali kana sa protocol sa usa ka establisamento o ahensiya.

In fairness sab ngadto sa Perpetual ug Probe, gitahod nato ang ilang desisyon kon mao kana ang ilang protocol. Aduna man goy mga polisiya ang matag establisamento nga dili nato puydeng mahilabtan. Pero kon tinuod nga lahi ang estorya nga gi-report ngadto sa buhatan sa Probe ug kamo ang gipakasala, mora tulibagbag kaayo kanang pamation.

Wala kitay mahimo kon ang protocol sa Perpetual ug Probe mao nga dili sila manubag sa mangawagtang nga butang sa ilang mga kliyente. Aduna gyoy mga establisamento ug ahensiya nga ingon niini ang protocol ug dili kita makabuot kanila. Pero nindot gyod unta kon lakipon nila pagbantay ang mga butang sa ilang mga kliyente aron komportable.

Sumbong ug reklamo? Text sa 0910-8105522)