EDITORYAL - Away hinuon ang sangpotan

Ikalipay sa mga kunsomedor ang laraw sa kagamhanan sa dakbayan sa Sugbo nga pagpublikar sa presyo sa mga nag-unang palaliton. Sa ingon, adunay katamdan ang publiko unsay tinuod nga presyo sa usa ka baligya.

Apan adunay kabalaka nga makamugna hinuon kini og kasamok. Makahatag kini og hinungdan sa panag-away tali sa mga tindahan ug mga pumapalit.

Pananglit lahi ang presyo nga mabutang sa billboard sa City Hall nga anha ibutang sa Fuente Osmeña ug lahi usab ang presyo nga ibutang sa mga baligya sa tindahan?

Unsa man ang mahimo sa kagamhanan sa dakbayan?

Nahitabo na ning pamantalaan kaniadto nga nagpatik pa og presyo sa mga utanon ug mga batakang panginahanglanon nga gibaligya sa merkado sa Carbon.

Adunay mireklamo tungod kay sa dihang gisita niya ang tindera nganong taas ang presyo sa iyang baligya sa presyo nga napatik sa pamantalaan, igo lamang siyang giingnan: "aw, adto pamalit sa newspaper nga nagpatik sa presyo!"

Ikalipay man sa mga kunsomedor ang maong laraw, apan maayong hunahunaon pa gyud sa mga opisyal ning dakbayan ang laing mga paagi nga kapugngan ang pagpahimulos sa mga negosyante pinaagi sa pagbutang og mga tawong mag-monitor mismo kanila ug maghatag og aksiyon ugaling masakpang nagpatuyang og pamahal sa baligya ug ipasangil ang kontrobersiyal nga expanded value added tax.

Malisud nang makaatiman pa ang mga kunsomedor sa pagreklamo sa mga mapahimuslanong mga negosyante. Napuno na ang ilang oras sa pagpangita og kuwarta nga ikasarang sa panginahanglanon sa adlaw-adlaw.