Kahakog

Tonne

Sugilanon kini sa usa ka tawo nga gigamhan sa espiritu sa kahakog. Daghan na siya og kuwarta apan nangindahay pa gyud siya nga moangkon og mas daghan pa gayud. Sa kahadlok nga makawat ang iyang tinumping bahandi, nagpabuhat siya og sekretong tagoanan sa may kisame. Hinimo kini sa usa ka puthaw kang kansang yawe sa sira niini anaa lamang sa gawas. Dili kini maklaro ni bisan kinsa. Usa niana ka adlaw, nakadaog sa loterya ang maong tawo. Tungod sa kalipay, iyang gidala ang iyang daog sa sekretong tagoanan aron hiposon. Wala siya makaalinggat nga sa dihang nisulod na siya, kalit lang siyang nasirad-an. Human og kupay sa mga salapi niyang daghan, nakabantay ang maong tawo nga siya diay nasirad-an. Nagpakitabang siya apan walay nakabati. Gipangita siya sa iyang banay og sa mga kapolisan sulod sa daghang mga adlaw. Tuod man, nakit-an sa asawa nga dunay yawe nga nagtaop sa may kisame. Ila kining giablihan, ug didto ilang nakita ang iyang bana, nagsiga ang mga mata nga naghakop sa iyang daghang kuwarta!

Pamalandong

Ang salapi ba gyud ang ugat sa kadautan? O ang panlantaw ba hinuon sa usa ka tawo ngadto sa salapi ang nakapahimo kaniyang dautan. Kalibutanon ang salapi apan dili ikalimod nga daghan kanato ang nagpaulipon kaniya sa hilabihan. Ang salapi, angay'ng gamiton sa hustong paagi diha sa pagtabang ug pagpalambo sa uban. Hibaw-i higala, nga sa panahon nga kita mobalik sa abog diin kita gikan, wala kitay bisan sentimo na lang nga mabitbit sa lubnganan.