EDITORYAL - Good news ug bad news

Hapit na lang itukmod ni Pres. Gloria Macapagal-Arroyo ang mga sakop sa media sa kauluhan aron malukapa ngadto sa mga, alang niya, "good news" sa iyang administrasyon.

Gikasagmuyo sa National Union of Journalists in the Philippines (NUJP) ang gibuhat ni Arroyo nga pagpamira og mga reporter unya tudloan unsay angayang sulaton sa tuyo nga mahatagan og prominence sa mga radyo, telebisyon ug pamantalaan ang maayong balita sa ingon matabunan ang mga kritisismo sa oposisyon.

Salawayon kaayo ang gibuhat ni Arroyo. Daan na siyang nasayod nga bisan unsaon dili niya magawongan ang media sa nasud. Human sa Martial Law, milig-on ang industriya sa media ug nahimo kining buhing hulad sa demokrasya sa nasud, nga bisan kinsang presidente dili makatandog.

Bisan unsaon pagpugos ni Arroyo nga malilian ang mga "good news" -- pagpangabot sa mga langyaw'ng mamuhunan, mga kalambuan sa agrikultura, teknolohiya, burukrasya ug uban pa -- sa iyang pamunuan, samtang magpabiling alatubangon ang kalisud, panikas sa eleksiyon, korupsiyon, patay, kawat, ug uban pang suliran sa nasud, kanunay'ng "bad news" ang hisgutan sa mga radyo ug telebisyon, ug ipatik sa mga pamantalaan.

Wala kinahanglana ang pag-publikar sa media aron mahimong epektibo ang mga tawo sa gobyerno. Usa pa, trabaho nila ang paghimo og mga butang nga ika-ayo sa lungsod -- ma-report man o dili sa media.

Bad news man tuod ang kanunay natong madunggan ug mabasahan, apan mao kana ang kamatuoran. Ang kamatuoran malisud talikdan.