EDITORYAL - Smoking ban nahinumdoman nasad

At last, at long last! Nahinumduman nasad ang No Smoking Ordinance human sa dugay'ng panahon nga nalimtan kini o kaha gipasagdan lang kini.

Suma sa taho ang Cebu Environmental Sanitation Enforcement Team (CESET) milihok na ug milusad na sa usa ka halapad nga kampanya batok niadtong mga tawo mibaliwala lang sa maong ordinansa.

Matud pa ni CESET tsip Samuel Dy kining anti-smoking gipasar sa Konseho sa siyudad tulo na katuig nga milabay apan "no one is taking it seriously."

Naobserbahan nga bisan pa sa mga "No smoking" stickers sud mismo sa pipila ka mga PUJ naa pa gyuy mga badlongong pasahero nga manigarilyo. Ug di lang mga pasahero, hastang ubang drayber manigarilyo usab.

Wala mahadlok molapas sa balaod tungod kay ang tigpatuman sa balaod nagpabuta-buta lang.

Karon misaad na ang CESET nga ila na gyung ipatuman ang ordinansa ug kadtong madakpan sa unang offense multahan og P100, sa ikaduha P200 ug sa ikatulo P500.

Kun tinud-on gyud ang pagpahamtang sa multa bisan si kinsa ang sad-an hayan magmatngon gyud ang mga isog molapas sa balaod. Pero kun kadtong madaugdaug lang ang silotan mapakyas lang gihapon ang kampanya ug usik lang ang panahon ug gasto alang sa maong kalihukan.

Manghinaut kita nga ning higayuna tinud-anay na gyud ang kampanya nga gisugdan na sa CESET adtong miaging adlaw. Suporta kami sa maong kampanya ug manghinaut kami nga magmalampuson kini.