Bililhon gyud kaayo ang managana sa matag karon ug unya diha sa pagpaabot sa Ikaduhang Pagbalik sa Dios. Tukma usab nga gamiton pud sa tawo ang kaalam og sentido kumon diha sa pag-aninaw sa mga lihok sa Dios diha sa iyang kinabuhi. Moabot ang atong Ginoo sa takna o sa higayon nga wala nato damha. Ug sa pag-abot na niya unya, mohimo kita og husay kon nag-unsa kita dinhi sa kalibutan nga atong gipuy-an. Mao kini ang nahitabo sa napulo ka mga dalaga samtang nagpaabot sila sa pamanhonon. Ang lima nga nakapangandam nakaambit sa bangkite sa kasal samtang ang laing lima nga nagdanghag, nahikawan nga moambit sa maong kasadya.
Mao nga kinahanglang managana kita diha sa pagpasiga kanunay sa atong pagka-Kristohanon pinaagi sa atong mga maayong binuhatan aron ang uban nga makakita mahayagan og makasinati sa nagkaduol nga Paghari sa Dios. Kinahanglan usab ang sentido kumon aron kita dili mawala o masaag sa atong panaw. Matang sa sentido nga nagkinahanglan og kaalam. Ug ang maong kaalam nagagikan sa pagbaton og kahadlok sa Dios sa tanang mga adlaw sa atong Kinabuhi. Dili maayo nga mohimo og pagbasol sa ulahi na. Sama nga dili hamtong ang pagtagam sa sunog tungod sa faulty wiring. Hinunoa haom nga ang mga hingtungdang ahensiya, naningkamot unta nga mapugngan ang maong trahedya pinaagi sa paghimo sa sentido komon nila nga motukmod alang sa usa ka makanunayong pagsusi sa mga deperensiya.