Bahin na sab sa text

Mga suki, ania na usay text nga akong nadawat gikan sa lain pang magbabasa niining ubos kong lindog. Ako gayod kining hatagan og luna aron magsilbi kining pahimangno ngadto sa uban aron dili mabiktima sa binuang sa modus operandi sa mga badlongon sa katilingban.

Ang iyang text nagkanayon: "Good day. Naay nag-text nako niadtong September 29, 2005. Niingon siya nga nakadaog kuno ko sa Pres. GMA Charity. Akong gitawagan. Niingon siya nga ipa-text ang akong ngalan, address ug edad. Unsa man ni? Pangilad ning ilang gi-text nako? Dia man koy landline kon gusto mo-call nako: 410-0114. Salamat." -- 0927-9983567 (Sept. 29, 2005--12:11;43)

Daghang salamat sa imong text. Wala kaayo koy kasayoran kon aduna bay Pres. GMA Charity nga gitukod ang atong Presidente. Tingali tungod sa akong ka-busy, dili na nako maahom pagbasa o pagsagap ang tanang mga impormasyon.

Una sa tanan, maayong tinuon kon tinuod ba kanang giingon nga Pres. GMA Charity. Bisan og dili kana tinuod ug tumo-tumo lang kana sa mga badlongon sa katilingban ug makadugang lang hinuon kana sa krisis sa administrasyon ni Arroyo. Nahiagom ra ba intawon siya sa daghang kontrobersiya unya dugangan pa nianang modus sa mga badlongon nga ipasangil o gamiton ang iyang ngalan, mosamot og kabasa ang iyang papel. Dili kini maayo. Sobra na sab ug maluoy kita sa Presidente.

Busa maayong klarohon gayod kon unsa ka tinuod nga adunay nag-exist nga PGMA Charity nga manghatag og premyo ngadto sa mga nanagbaton og cellphone. Malipay kita kon tinuod kini. Ikahinangop nato kon lehitimo kining maong promo.

Apan sa akong tan-aw niini, susama gayod og estilo sa ubang text scam nga nakabiktima na sa daghan natong kaigsoonan. Ang sistema sa approach pareho gayod sa ubang text scam diin maoy gipasanginlan ang PCSO, Central Bank ug uban pa. Pero dili na sila makalusot kay nagpagawas na man og pahimangno sa publiko ang PCSO ug Central Bank mahitungod niini.

Karon, posibleng nangita na sab silag laing paagi. Kay dili na man sila makalusot pinaagi sa paggamit sa ngalan sa PCSO ug Central Bank, posibleng mao na usay ilang gigamit ang ngalan sa Presidente sa ilang modus operandi. Dakong pasipala...! Kana kon lagi, text scam ang imong madawat.

Ang akong lang ikasulti kanimo mao nga ayaw dayon pagtuo sa congratulatory message nga imong nadawat.

Sumbong ug reklamo? Text sa 0910-8105522)