Dili magpadala sa gibati

Nasayod na kita nga karong panahona nauso na kaayo ang pangilad. Bisan unsa na lang nga paagi ang gihimo sa mga badlongon sa katilingban aron makabiktima sa ilang isigkatawo. Usa sa nauso karon pag-ayo mao kining text scam diin maoy kasagaran nga mabiktima ang mga indibidwal nga nanag-iya og cellphone. Aduna usay scam nga ipaagi sa internet ug maoy kasagarang mabiktima kadtong mga tawo nga nagbaton og e-mail account.

Niining bahina sa akong lindog, tugoting hatagan nakog luna kining e-mail nga akong nadawat gikan sa usa ka magbabasa kinsa mihangyo nga dili lang ibutyag ang iyang ngalan ug e-mail address alang sa iyang seguridad. Mihangyo sab siya nga kon mahimo ipasibya ang iyang gi-email kanako sa radyo ug telebisyon. Apan sanglit wala man kitay tulomanon sa radyo ug telebisyon, anhi lang nato kini ipagawas sa atong lindog.

* * *

Ang iyang e-mail nagkanayon: "Sir, maayong adlaw diha kaninyo ug ilabi na gayod ang tanang nagasubay niining inyong basahon. Sir, naalarma gayod ako sa dihang nakabasa ko sa imong lindog bahin sa modus sa text scam. Nganong aduna may ingon niini? Ako, sir, nasayod nga aduna pay labaw nianang pagpangilad. Usa ka adlaw niana, sa dihang ako miabli sa akong e-mail ad aron sa pagtuki kon nabawosan na ba ko sa akong suod nga higala, aduna akoy nadawat nga usa ka mensahe ug ako nagdahom nga gikan kini sa akong kinaham nga gipaabot. Dako nakong kalipay sa akong pagbasa niini kay nakadaog kuno ko sa UK National Lottery. Kon imo lang kuwentahon sa Philippine money mahimo gayod akong bilyonarya! Ug busa wala gayod ako mahimutang. Ako dayong gi-reply-yan kay namasin ko nga usa ka adlaw niana mahimo akong bilyonarya. Mangiyawat lang ba. Ako hapit gayod madala sa ilad kay nitubay lagi intawon ko niini. Nasagmuyo na lang ko kay mibungat man og dako nga kantidad. Wala koy tarong kinatulgan tungod sa paghunahuna nga madato ugma damlag. Maayo gani nga gipakita to sa Magandang Gabi, Bayan ang kabahin sa mga scam ug ilabi na gayod sa testimoniya sa mga biktima. Ug dinhi nalamdagan ang akong hunahuna ug ang akong gibati. Ako nakaamgo nga dili maayo nga magpadala ta sa atong gibati kay kita ray mahulog sa alaot. Palihog ayaw lang ipatik ang akong ngalan ug e-mail ad."

* * *

Salamat sa imong e-mail kanako. Tinuod bitaw nga daghan na kaayong paagi sa pangilad karon. Diha sa internet, daghan kaayong lehitimong mga offer. Kana bang mga offer nga walay sagol pangilad. Pero migamit na sab lagi sa internet ang ubang mga mangingilad maong dili na kakompiyansahan. Basta aduna gani offer nga "too good to be true", posibleng dili gayod kana tinuod.

Sumbong ug reklamo? Text sa 0910-8105522)