Inay hangpon ang pagdason sa Visayas Ombudsman sa sugo sa Commission on Audit (COA) ngadto sa kadagkoan sa Cebu State College of Science and Technology (CSCST) (1) paghunong sa pagkolekta sa makabungog nilang honorarium sa evening program ug (2) pag-uli pa gyod sa gibolsa nga dakong kuwarta nga di ila, ang nagpakabana nga mga magtutudlo, mga tinun-an ug mga kawani sa CSCST nikuwestiyon sa kamakiangayon sa resolusyon nilang Ombudsman Director Virginia Palanca-Santiago ug Deputy Ombudsman Primo Miro:
Matod nila ang gipauli nilang Miro, Santiago ug sa COA mao rang honorarium gikan sa Enero hangtod sa Hunyo ning tuiga, wa hisguti ang nahaunang honorarium nga nadawat nilang CSCST President Jose Sal Tan ug kaubanan sa niaging tulo na ka tuig; ug
Nangutana sila nganong igo rang ipauli ang minilyon ka pesos nga kuwarta nga nakolekta nilang Tan ug kaubanan nga unta klaro mang nagpapating ang kadagkoan sa CSCST pagkilkil sa panudlanan sa eskuylahan bisan sa ilang kasayuran nga nakalapas sila sa balaod.
Kon tinuod ang pasangil sa nagpakabanang mga magtutudlo, mga tinun-an ug mga kawani sa CSCST nga tulo na ka tuig nga nagpabusdik silang Tan ug kaubanan sa kuwarta nga di para nila isip bayad sa mga klase nga wa nila matudloi, nganong ang honorarium ra man sa unang unom ka buwan ning tuiga ang gipauli? Ilubong na ba lang sa kalimot ang mas dakong kantidad nga nakuha kon tinuod nga tulo ka tuig nang pagpahimus sa kadagkoan sa eskuylahan? Kon kalapasan sa balaod ang pagkolekta nilang Tan ug kaubanan sa honorarium sa evening program gikan sa Enero hangtod sa Hunyo ning tuiga, nganong wa may ek ang COA ug ang Ombudsman sa samang kalapasan nga giingong ilang nahimo sukad niadtong 2003?
Ug kon para sa COA ug Ombudsman kalapasan sa balaod ang pagkolekta nilang Tan ug kaubanan sa makabungog nga honorarium, nga makalilisang ang gidak-on kay hapit kalima pil-a ang binuwan nilang suholan, nganong kutob ra man sila sa pagpauli sa kuwarta? Di na ba diay dakong krimen ang pag-ilog sa kuwarta nga para unta sa batakang mga panginahanglan sa mga tinun-an ug pagpalambo unta sa kalidad sa edukasyon sa CSCST?
Nagpabaga silang Tan ug kaubanan pagdawat sa makabungog nga honorarium bisan sa gisubli-subli nga pasidaan sa COA. Napugos na lang sila paghunong sa binuang dihang nabisto nang ilang pakauwaw sa media. Pero padayon pa gihapong gikuwestiyon ang balaod nga ilang gilapas.
Mao bay ipasabot sa COA ug Ombudsman nga mahimo rang molusot silang Tan ug kaubanan sa klarong kalapasan pinaagi sa pagpasalipod sa depensa nga lahi lang ang ilang pagsabot sa mga probisyon sa balaod?
Email:
leo_lastimosa@abs-cbn.com