Sa dokumento gikan sa Revenue Integrity Protection Service sa Department of Finance (DOF), silang Mangaoang ug Reyes ang katapusang mga opisyal sa customs nga naghupot og ranggo nga collector.
Sa reaksiyon ni Mangaoang, matud niya, wala siyay angayan ikahadlok tungod kay wala siyay tinaguan. Tingale, pormalidad lamang kining pagpa-ilawom sa lifestyle check sa mga dagkong opisyal nga ubos sa DOF.
Ang RIPS, pinaagi ni Intelligence Officer Virman Sayang-od, mituon sa "lifestyle" nilang Mangaoang ug Reyes, apil na silang Estrella Martinez, Edgar Martinez, Marites de las Llagas, ug Elizabeth de las Llagas, pinaagi sa pagkuha sa ilang mga tax declarations sa ilang mga kabtangan sa Cebu City Assessor's Office.
Gawas nila, mibahad ang RIPS nga aduna pa gyuy daghang ngalan sa mga empleyado sa BOC-Cebu nga ipa-ilawom nila sa lifestyle check. May pipila na ka ngalan sa mga examiner ug appraiser ang misibaw, apan dili lang una nato ibutyag karon.
Ubay-ubay sa mosunod nga mga ngalan anaa nakadestino sa Assessment Division. Sumala pa sa atong tinubdan nga ubay-ubay sa gisugdan na pagpa-ilawom sa lifestyle check mga examiner ug appraiser, apil na ang ilang mga division chiefs ug assistance chiefs.
Busa, kamo diha sa BOC-Cebu pag-andam-andam na kamo sa inyong kaugalingon. Dili lang ko moingon kaninyong sugdi na ang pagbalhin sa ngalan ang rehistrasyon sa inyong mga sakyanan, balay ug negosyo tungod kay bisan unsaon ninyo masakpan ra kamo gihapon sa taga RIPS.