Dili makiangayon

Angay'ng imbistigahon ni Mayor Tomas Osmeña ang binuang sa ubang mga opisyal ug kawani diha sa City Traffic Operations Management.

Ang akong gipasabot mao kining binuang nga kon dunay mga sakyanan nga gipanag-iya sa mga kawani sa Citom mahimo ra diay nga tangtangan sa clamp nga dili mobayad sa iyang obligasyon ang tag-iya?

Hagiton nako ang mga opisyal sa Citom nga nagpatangtang sa clamp sa sakyanan nga adunay plate numbers GTW-330 nga mopresentar sila og tukmang pagpasabot ngano nga gipatangtangan nila kini og clamp nga wala makabayad sa multa.

Basi sa inpormasyon nga akong nakuha gikan ra sa mga kawani sa Citom nga ang maong multicab nga sakyanan gipanag-iya ni Tony Ortega, kinsa maoy administrative officer sa Citom.

Gisuwayan nako pagkontak ang Citom administrative division kagahapon apan wala didto si Ortega. Gikontak usab nako si Jerry Ranay, ang hepe sa clamping section sa Citom apan wala usab didto si Jerry.

Dili maayo ang ilang gihimo. Ang maong multicab gi-clamp sa mga Citom enforcers kay giparking kini sa dili tukmang lugar diha sa dalan Legaspi kaniadtong Hulyo 13 sa alas 11:10 sa buntag.

Ambot kon kinsa kaha ang nagbuot-buot sa pagpatangtang sa maong clamp bisan og wala pa bayri ang multahan sa drayber o tag-iya ba kaha sa maong sakyanan.

Si Abraham Mordeno, usa ka sakop sa Citom nga nadistino sa clamping section, nahinabi nako kagahapon. Matud ni Mordeno nga mahimo ra man kuno nga tangtangan sa clamp bisan og wala pa makabayad og multa ang tag-iya.

Wala ko makapugong sa pagkatawa. Mao ba? Tukma ba kini mayor Osmeña? Ang pag-clamp sa mga sakyanan nga ipataka og parada sa mga wala itugot nga lugar gituyo aron ang mga tag-iya mapugos sa pagbayad sa ilang obligasyon.

Unsa man diay, kining ordinansa numero 1657 dili mahimong ipatuman sa mga opisyal ug kawani sa dakbayan? Ngilngiga god?

Gideklarar na sa Korte Suprema nga nahasubay sa balaod ang pagpatuman sa dakbayan sa maong ordinansa nga gitumong aron dili magpataka og parking sa ilang mga sakyanan ang mga motorista.

Gitumong kini aron nga dili kini makatampo sa kahuot sa atong trapiko.

Magpaabot ko sa reaksyon ni Mr. Ortega ug ni Mr. Ranay. Palihug lang og text sa akong secretary sa cell number 0917-3836645 aron mahibaw-an nako ang inyong tubag kabahin niining maong kontrobersyal nga isyu.

* * *

Karon nga napasakaan na og kaso ang duha ka kawani sa City Hall nga responsable sa pagpalusot og mini nga business permit, kinahanglan nga palapdan pa ang imbistigasyon.

Nagtoo ko nga dili ra sila si Remberto Cabigon ug si Sherwin Baguio maoy responsable sa maong binuang pag-isyu og fake business permit sa Nolsie Trading diha sa barangay Santo Niño.

Angay usab nga karong napasakaan na og kaso silang duha, kini si Baguio kinahanglan nga ibutang sa preventive suspension aron dili makapanghilabot sa ubang dukomento nga makadaut unya sa nagpadayong imbistigasyon.

Kini hinoon si Cabigon dugay na kuno nga mipalta sa iyang trabaho nga wala mananghid.

Ang imbistigahon na usab sa NBI mao ang kaso sa Banilad Auto Parts nga naisyohan gihapon og mini nga business permit.