Ang estilo niining maong mga mangingilad mao nga manawag lang sila sa telepono ug magpaila sa makatubag nga representante sa usa ka recruitment agency nga nagtanyag og direct hiring. Hagdon sa suspek ang makatubag sa pagpanarbaho sa gawas sa nasud uban ang pasalig nga magadawat kinig dakong suweldo.
Maayo sab gayod nga mopasabot ang suspek mao nga daghan ang motuo ug madani sa iyang ihaylo. Tiaw ba nga direct hiring man. Wala nay daghang proseso sa gikinahanglang mga papeles tungod kay nahikay na (kuno) ang tanan. Ang pagbutang na lang sa ngalan sa aplikante maoy nakulang. Gilaliman ka?
Aron gayod madani ang prospect, papilion kini sa suspek kon asa nga nasud kini gustong manarbaho? Sa Kuwait ba, sa Saudi Arabia, sa Iraq, Italy, Estados Unidos, Canada, Japan, Taiwan ug uban pang mga nasud. May libre pa gayod nga transportasyon paingon sa Manila gikan sa dapit o probinsiya diin ang prospek magagikan. Pastilan, kinsa man gyoy dili mahaylo niini, no?
Mao nga daghan ang madani niining maong matang sa tinonto. Sa higayon nga mosakay na ang prospek sa bulatik sa suspek, mangayo dayon ang suspek og dakong kantidad isip placement fee. Mopasalig ang suspek nga human mahulog sa usa ka partikular nga bank account ang kantidad nga giyamar, ipadala dayon niya ang mga papeles sa prospek aron makalarga na kini.
Usa nako ka higala nga taga Dagohoy, Bohol naghingasoy nga daghan na ang diriyot mabiktima niining maong matang sa tinonto didto sa ilang lungsod. Maayo gani kay may nakasulti kanila nga binuang ang maong sistema sa recruitment. Ang nagsulti sab kanila nabiktima na sa maong matang sa tinonto.
Mao nga pagbantay gayod kamo niining maong estilo sa modus operandi. Dili lang sa siyudad kondili lakip na sa kalungsoran sa lainlaing kaprobinsiyahan naglihok na kining maong mga badlongon sa katilingban. Kon kamo nangandoy nga maka-abroad, seguroa nga makatumong kamo sa ahensiya nga legal ug lehitimo. Ayaw ninyo sakyi gilayon ang mga tanyag nga daw nindot ra kaayo nga pribilihiyo nga maka-abroad kay posibleng dili gayod kana tinuod.
Ang labing maayong buhaton mao ang pagsuta kon ang ahensiyang nang-recruit accredited ba sa POEA o rehistrado ba. Ayaw kamog tuo nianang recruiters nga manawag lang sa telepono kay posibleng nangilad lang kana.
Sumbong ug reklamo? Text sa 0910-8105522)