EDITORYAL - Laing dakong dungog sa Sugbo

Gipahibawo ni Presidente Gloria Arroyo adtong miaging adlaw nga ang Sugbo maoy mo-host sa Association of Southeast Asian Nations (ASEAN) Summit sa sunod tuig.

Dinhi sa atong rehiyon -- Southeast Asia -- kining Asean summit maoy labing importanteng kalihukan nga sukad adto ra kini himoa sa Manila.

Mga presidente ug prime ministers sa napulo ka sakop sa Asean manambong niini ug hasta pa gani ang Presidente sa Estados Unidos ug primer ministro sa Japan ug Englatera.

Si Presidente Arroyo maoy mirekomendar nga ang Sugbo maoy himuong host sa maong Asean Summit. Ug kini mipakita sa iyang dakong pagsalig nga ang Sugbo adunay kapasidad sa pag-host sa maong panagtigum sa mga dagkong lider sa Asean region.

Ang paghatag sa Sugbo og kahigayonan sa pagpahigayon sa summit, mao usay paghatag niini og kahigayonan usab nga mailhan pa gyud isip usa ka importanteng dakbayan sa kalibutan.

Kaya ba sa Sugbo kining dako ug importanteng kaakuhan? Sa walay pagduha-duha si Presidente Arroyo mitubag sa maong pangutana nga, Oo kaya sa Sugbo.

Gihangop sa atong mga lider ang gibutyag ni Mrs. Arroyo ug lakip sa paghangop manghinaut usab kita nga ang maong kalihukan suportahan sa atong komunidad ug mapakita nato ang atong igong kapasidad sa pagsilbe sa Asean isip host sa summit niini.