Mga karnerong nagkatibulaag

Sama sa mga karnero, nagkatibulaag na ang baruganan sa Simbahang Katoliko mahitungod sa mga isyu nga giatubang sa katilingban.

Usa ra ko sa naglibog nganong lahi-lahi ug sukwahi kaayo ang matag baruganan sa mga lider sa simbahan.

Si Manila Archbishop Gaudencio Rosales uyon kaayo sa gibuhat sa Malacañang paggamit og water cannon batok sa mga raliyista, bisan nasayod siyang iyang tulo ka igsuong obispo ug mga pari apil sa naigo a tubig nga gipasirit pagbabag sa ilang demonstrasyon tungod kay wala makakuha og permiso sa lokal nga kagamhanan.

Si Rosales nagkanayon nga dili makatarong og padagan sa gobiyerno ang mga lider kun magpadayon kanang mga demonstrasyon, nga gipaagi og prayer rally. Siya ra pud ang obispo nga miluwat og pamahayag nga medyo pabor nianang no permit no rally policy sa gobiyerno.

Si Cebu Archbishop Ricardo Cardinal Vidal dakong supak nianang pagpasirit og tubig sa mga demonstrador. Gawas sa cardinal, si El Shaddai leader Mike Velarde nakapanaway usab nianang calibrated preemptive response (CPR) sa gobiyerno batok sa mga rally.

Wala pa ko kadungog og hiniusa ug opisyal nga baruganan gikan sa Catholic Bishops Conference of the Philippines (CBCP) nga gipanguluhan sa buotang Arsobispo Angel Lagdameo (kanhi kura paroko sa San Nicolas Parish).

Kanus-a pa man motingog ang CBCP? Unya na og adunay dautang mahitabo nianang tulo ka obispo ug kaparian nga nag-apil-apil sa mga demonstrasyon nga walay permit?

* * *

GUBAT. Diha kadtoy migawas nga item sa balita sa miaging semana nga nagkanayong mihimakak ang Malacañang sa taho nga adunay nag-umidong gubat tali sa gobiyerno ug sa Simbahang Katoliko.

Katuohan dili kining maong balitaa.

Dayag pa kaayo ang sitwasyon nga ang simbahan dili andam makigpakong sa gobiyerno.

Sa sulod sa liderato sa simbahan, tataw usab kaayo ang panagbulag sa ilang baruganan. Ang CBCP daw wala pay imik niining walay puas nga panagsugat sa mga demonstrador ug mga polis ug militar sa karsada, bisan sa kadaghan na sa nangabun-og sa isi'g ka habig.

Busa, dili pa ko motuo sa pagkakaron nga ang simbahan adunay planong paglumpag sa administrasyon. Kanang pag-apil-apil sa mga obispo ug ni running priest, Fr. Robert Reyes, ila lamang kabubut-on ug paggamit sa katungod isip mga Pilipino.

* * *

SULAYAN. Pero nganong dili man nato sulayan ang nasud nga walay demonstrasyon ug kagubot?

Basin pa diay og molambo kining atong ekonomiya.

Nasayod naman tingale kita nga ang ekonomiya ug politika kaluha ra. Kun galmon nato ang usa, kinahanglang galmon nato iyang kaluha.

Gubot gani ang usa, mapagan gyud ang usa.