Nisamot kalawom ang kontrobersiya sa pagpatuyang sa kadagkoan sa Cebu State College of Science and Technology (CSCST) pagpanguha og bisan unsa na lang kurso sa hilit nilang satellite schools ug way tihik-tihik nga pag-apud-apod-mora silang nagsabod og lawog sa ilang nataran-sa ilang mga diploma ngadto sa ilang alyadong mga politiko ug mga negosyante. Kini human niangkon si Barangay Kapitan Michael Ralota sa T. Padilla, Cebu City nga nigradwar siya og duha ka kurso nga wa siya magpalista ug wa niya eskuylahi. Si Ralota gradwado sa Associate in Industrial Engineering sa Carmen campus ug sa Certificate of Science Teaching sa Camotes campus. Niangkon si Ralota nga giawhag siya sa kadagkoan sa CSCST pagpakita sa iyang transcript of records ug base sa subjects nga iyang nakuha sa iyang pagka arkitekto gihatagan siya sa duha ka academic degrees. Matod ni Ralota igo lang siyang gipabayad og kapin sa P1,000 sa kada kurso pero wa siya patambonga og bisan usa ka klase ni pakuhaa og bisan usa ka pasulit. Kon di galingan sa diploma ang CSCST, unsa may itawag sa ilang pagbaligya sa ilang mga kurso nga mora silang nag-baratilyo sa Carbon?
Wa mag-inusara si Ralota ning raketa. Ang station manager sa Radyo ng Bayan, si Rene Alquizola, nga samang Ralota gilista sab nga gradwado sa Certificate of Science Teaching sa Camotes campus, nitug-an sa DYAB Radyo Patrol nga wa siyang kapalista sa kurso, wa siyang kataak sa Camotes, wa siyay nabayran bisan usa ka dako, wa siyay nakuha nga bisan unsang pasulit ug, labaw sa tanan, wa siyang kahibawo nga gradwado diay siya. Kuwestiyonableng nang daan ang kang Ralota nga pagradwar base lang sa iyang karaang transcript of records, mas kahibulongan ang paghatag og diploma ni Alquizola nga wa gani mahibawo nga tinun-an ug gradwado diay siya sa eskuylahan nga wa niya mataaki sukad masukad! Gawas ni Ralota, pila pa ka gradwado sa CSCST nga igo lang gipabayad? Ug gawas ni Alquizola, pila pa ka gradwado sa CSCST nga igo lang gilista pero wa mahibawo nga tinun-an diay sila?
Bisan sa kadagko sa mga anomaliyang gipasangil batok ni Dr. Jose Sal Tan ug ubang tagduma sa CSCST, mas bugnaw pa sa simod sa itoy ang reaksiyon ni Kongresista Simeon Kintanar, kansang atensiyon akong gitawag kay siyay nangamahan sa balaodnon paghimo sa CSCST nga unibersidad. Nganong di man siya interesado nga makaila sa tinuod nga bayhon sa eskuylahan nga gusto niyang hatagan og dugang gahom ug kuwarta? Gipaburot ba pag-ayong gidaghanon sa mga kurso ug mga tinun-an sa CSCST aron pagpalig-on sa ilang aplikasyon pagka unibersidad? Nasud ba lang sa ilang bolsa si Kintanar o kabahin gyod sa higanteng maniobra sa kadagkoan sa eskuylahan?
Email: leo_lastimosa@yahoo.com