Paso sa Camotes

Kon wa pa mo malipong sa kadaghan sa mga kurso nga nakuha sa kadagkoan sa Cebu State College of Science and Technology (CSCST), nia pay lain nga akong nakuykoyan. Nagpakabanang kawani sa CSCST nipada nako og kopya sa programa sa 38th Commencement Exercises sa CSCST Fishery and Industrial College sa San Francisco, Camotes niadtong Marso 21, 2003. Niadtong adlawa, ang mga tagduma sa CSCST nakahimo na sab og kasaysayan: Nagdungan na sab sila og paso para sa gradwasyon sa kurso nga gidudahan na karon tinuod ba gyod nilang na-eskuylahan.

Ang labing talagsaong kasaysayan nahimo ni Dr. Jose Sal Tan, presidente sa CSCST. Kay gawas nga siyay nangu sa mga opisyal nga nipadangat og mga mensahe pagpahalipay sa mga gradwado isip presidente sa CSCST ug vice chairman sa Board of Trustees (BOT) sa eskuylahan, ug gawas nga siyay nanghatag sa mga diploma ug certificates, siya pa gyod ang, nakatag-an mo, numero uno nga gradwado sa kurso nga, panggunit mo sa inyong mga lingkoranan, Certificate of Science Teaching.

* * *

Gawas ni Tan, nipaso sab pagkuha sa ilang diploma sa samang kurso silang Dr. Victor Villaganas, bise presidente sa CSCST, ug mga superintendente nga silang Dr. Venerando Cunado sa Carmen campus, Dr. Florencio Ramos sa Danao campus, Dr. Pedrito Pontillas sa Argao campus, Dr. Reynaldo Gaballes sa Moalboal campus, Dr. Severino Romano sa Daanbantayan campus, Dr. Ponciano Bontia nga niadtong higayona didto pa sa Camotes campus, Dr. Wilma Reyes sa Tuburan campus, Dr. Hospicio Saniel sa Barili campus, Rodolfo Burgos sa main campus ug Edgar Emphasis sa Mandaue campus.

Nipaso sab ang paboritong mga higala sa CSCST: Engr. Samuel Dy, sakop sa BOT sa CSCST; Willie Mulla, kontrobersiyal nga opisyal sa Kapitolyo; Rene Alquizola, karon maoy station manager sa Radyo ng Bayan nga naa magsibya sa CSCST main campus; Arch. Michael Ralota, samag ngan sa barangay kapitan sa T. Padilla, Cebu City; ug Alvin Cimafranca, ISO auditor.

Maayo tingaling mohatag og matinud-anong katin-awan ang tanang nanganlan sa ibabaw unsay ilang nakat-onan sa kursong "Certificate of Science Teaching." Kay kasaligan nakong tinubdan nipasangil nga wa sukad masukad nitanyag ang Camotes campus ning maong kurso.

* * *

Sa makausa pa, nangutana ang nagpakabanang mga tinun-an, kawani ug magtutudlo sa CSCST: Giunsa man nilang Tan ug kaubanan pagpangitag panahon pagkat-on sa kurso? Sa kadaghan sa nagpatungpatong nilang gimbuhaton, giunsa man nila pagkahigayon pagdungan og lawig sa balurong kadagatan paingon sa layong isla sa Camotes?

Nahadlok kong igo lang silang nagpahimus sa sistema sa long distance learning sa CSCST, nga gihulagway nga mahimo rang di magkita ang magtutudlo ug mga tinun-an. Hinaot nga di tinuod ang pagduda nga ning kursoha, sama sa naandan, nagdungan ra sab og gradwar ang magtutudlo ug mga tinun-an.