Usahay ang atong pamatasan mogawas nga maayo o dili ba dautan sa panlantaw sa uban. Usa ka babaye nagpunay lang og pabulhot sa iyang sigarilyo sulod sa usa ka bus. Ang aso daw hapit na lang niya ibuga sa mga dagway sa mga tawo nga kauban niyang luwan sa maong bus. Usa ka tiguwang nagmama og tabako. Ang tiguwang nangluwa sa may bintana.
Butang nga gikasuko sa babayeng nanigarilyo:" Kahugawan gud nimo Iyo! Kaluod anang mag-usap ta og tabako oy!" Ang tiguwang kalma nga mitubag: "Sagdi lang, kay dili man pud ni bitaw maoy hinungdan kon nganong masunog ang atong kalasangan."
Pamalandong
Adunay uban nga dili sensitibo kon nakasamok ba o naka-istorbo ba sa uban tungod sa ilang binuhatan. Kusog kaayo ang tawo masuko og maglagot labina kon siya na ang hingtungdan sa mga binuhatan nga kasagaran niyang buhaton ngadto sa uban.