Edukasyon DR. ADOLFSON

Tulo ka mga kabalyero ang niagi sa mangitngit nga suba sa dihang nadungog nila ang usa ka gamhanang tingog: "Hunong!" ug mihunong sila. "Kanaog!" mando sa usa ka tingog. Ug nanganaog sila gikan sa ilang tagsatagsa ka mga kabayo. "Pagkuha og mga gagmay'ng mga bato og isulod kini hangtod nga mapuno ang inyong mga bulsa" og gituman nila kini. "Ugma sa pagsubang sa adlaw kamong tanan malipay apan maguol" pahimangno sa maong tingog. Ug nipadayon ang mga kabalyero sa ilang panaw. Tuod man nianang sayong kabuntagon, usa ka milagro ang nahitabo! Ang mga bato sa ilang tagsa-tagsa ka mga bulsa nahimong mga diamante, og mga mahalong mga bato. Dinhi nahinumdom sila sa pahimangno. Nalipay sila tungod sa mga mahalong bato nga ilang nakuha, apan naguol pud sila tungod kay wala sila mopunit og mas daghan pa.

PAMALANDONG

Daghang ang mga kahigayonan nga gihatag sa Dios sa tawo aron siya makakat-on. Butang nga giusikan og gipakawalay-bili sa kadaghanan. Mao nga kitang mga estudyante, magtinarong og magmakugihon gyud unta sa pagkuha og kinaadman. Bulawanon ang panahon sa pagkat-on mao nga angay lamang nga kini ugmaron.