Pamalandong matag Domingo
Oktobre 16, 2005; Ikakawhaag- Siyam nga Domingo sulod sa tuig
Mga Pagbasa: Is.45,1,4-6/1 Tes. 1:1-5 Mt. 22:15-21
Nasabak ang atong Ginoo sa makalinglang pangutana. ""Supak ba ang pagbayad og Buhis ngadto sa Emperador sa Roma?" Apan listo ang atong Ginoo sa iyang pag-ingon: Ihatag sa Emperador ang iya sa Emperador og ngadto sa Dios ang iya sa Dios. Daw Dios ang pagtan-aw sa kadaghanan ngadto sa Emperador sa Roma kaniadto. Tumong man gud sa mga Pariseo nga si Jesus bikton nila aron makapasang-at sila og tukmang sumbong batok kaniya.
Gawas nga usa ka makasaysayanong bayhon ang mga Emperador sa Roma diha sa pagkaumol sa atong pagtuo, mahimo usab nga atong masimbolo ang maong bayhon diha sa atong aktwal nga pagbansay-bansay sa atong pagtuo. Adunay mga higayon nga mohimo kita og pagpili. Kon ang atong pagabuhaton ba, iya ba sa Dios o iya ba sa kalibutan. Dili lang gyud tuyoon nga mas nalimtan pa nato ang paghatag ang iya unta sa Dios kay napalabi man nato paghatag ang iya sa kalibutan. Pananglit, kining paggahin og bisan usa na lang ka oras sa pag-ampo og pagsimba. Ato man hinuong gipulihan ang Balaang Adlaw segun sa bisan unsang gusto nga atong himuon. Wala nato hatagi og igong bili ang maong Balaod: "Balaana ang Adlaw sa Ginoo." Ang Balaod sa Ginoo gimugna alang kanatong iyang mga anak, aron kita magiyahan. Maingon nga ang Balaod sa Nasod natagik aron ang tanang molupyo mabulahan.
Mensahe ning Domingoha mao nga atong batonan ang pagbalanse sa kinabuhi. Bisan pa man kon kita ania pa sa kalibutan, apan wala kini magpasabot nga atong hikalimtan ang iya sa Dios, apil na niini ang atong tagsa-tagsa ka kinabuhi. Kon iya kita sa Dios nan, husto og makatarunganon man tingali nga ato kining alimahan agig halad ngadto sa Ginoo. Mao nga dili gyud maayo ang magpatuyang taman sa ginhawa. Kon motahod kita sa tawhanong balaodnon sa Dios pa kaha?