EDITORYAL – Gagmay'ng problema sa turismo

Atong giduso pag-ayo ang atong Sugbo isip usa ka major tourist destination dili lang dinhi sa Pilipinas kundili usab sa tibuok kalibutan.

Ang atong pagpaninguha nagsugod nag-angkon og matam-is nga bunga. Nagpadayon ang pagsaka sa gidaghanon sa mga turista -- mga langyaw ug mga kaigsuonan tang Pinoy gikan sa nagkadaiyang dapit sa nasud.

Suma pa sa mga eksperto, ang atong mga hotel kanunay'ng puno sa mga bisita. Gani suma pa nila dunay mga panahon nga wala nay kaabtan ang uban mga turista ug yanong mga biyahero.

Tungod niini, girekomendar ning maong mga eksperto sa pagtukod og dugang mga hotel ug pun-an og mga kuwarto sa mga hotel nga nanagbarog na.

Kalabot niining pagduso ngadto sa unahan sa turismo dinhi sa Sugbo, ato sang tagdon ang pipila ka mga ginagmay nga problema diin maapektahan ang atong pagka-tourist o visitor friendly.

Usa niini mao ang pipila sa atong mga taxi diin ang drayber niini nagkalago lang ug suma pa sa mga reklamo nga atong nadawat dinhi "nagkabaho lang" usab.

Naa say mga taxi kang kansang mga aircon units wala na motrabahog husto, diin hangin ray mogawas. Kining mga matang sa taxi makadaut sa atong pagka-tourist friendly kun langyaw ang makasakay.

Dugay na baya ning problemaha apan wa pa gayud kahatagig seryosong pagtagad. Either nga wa masayud ang kadagkuan ta sa turismo o sayod sila apan gipasagdan lang kay tingali alang kanila usa ra kini sa gamay'ng suliran.