Tingog sa OFW

Angayng pasidunggan ang paningkamot sa nagkalainlaing grupo pagtabang sa Pinoy nga mga trabahante tua manimpad sa nagkalainlaing kanasuran sa kalibotan, layo sa ilang gikamingawang mga pamilya. Kay samtang dakog kita ang kasagaran nila, gibugtian sab sa nagbaha nilang luha ug, sa pipila ka kaso, sa pag-ula sa ilang dugo. Nagbuntaog ang mga kakulian ug mga pagsuway nga ilang nahiagoman sa mga kamot sa langyaw nilang mga tagduma.

Ang gobyerno kutob ra sa pag-ulog-ulog sa OFWs pinaagi sa pagtawag nilang bag-ong mga bayani. Way lalis nga mga bayani sila. Ang ilang dollar remittances maoy tinuod nga nagbuhi sa nasudnong ekonomiya sa niaging katuigan. Labaw sa gipanghambog nga ekonomikanhong mga programa pagpalambo sa lokal nga mga industriya ug pagdapit sa langyawng puhonan.

Pero sa kadako sa ilang natampo, ang OFWs gipasagdan lang gihapon sa nagkalainlaing ahensiya sa gobyerno.

* * *

Salamat sa mga grupo sama sa Friends of Pedro Foundation, Inc. (FPFI). Gipangulohan ni Padre Carmelo Diola, ang FPFI nakakita sa posibleng labing gamhanang panagang sa OFWs ug sa ilang mga pamilya sa kapait, mga tentasyon ug ubang hulga sa kaalaotan nga mohalili sa higanteng haw-ang sa ilang paglinay-anay: Ang pagpalambo sa ilang pagtoo sa Diyos ug mga mithi sa katarung ug kamahigugmaon sa pamilya aron mapuno ang ilang psycho-spiritual nga mga panginahanglan.

Si Padre Diola ug kaubanang Tess Tejero ug Raul Puentespina, kanhi OFW kansang asawa tua pa magtrabaho sa Hong Kong, nagkauyon nga ang ilang website (http://www.friendsofpedro.net ) nga gisugdan pila na ka tuig ang nilabay di paigo pag-abot sa OFWs ug sa ilang mga pamilya. Maong nagpasiugda na sab sila og libreng seminar-workshops, "Panimpalad" ug "Pabawon," para sa OFWs nga padung nang mobiya ug ang mga sakop sa ilang mga pamilya.

Apil sa gitudlo sa FPFI ngadto sa OFWs ug sa ilang pamilya mao ang pagamit sa Internet ug ubang modernong teknolohiya sa komunikasyon nga gipanghinaot nga mamahimong tambal sa kamingaw ug taytayan sa pag-amuma sa ilang pagminahalay.

* * *

Unsay mahitabo kon libre nang magkatinawganay ang OFWs ug ang ilang pamilya? Magbinayloay ba lag greetings? O maghinilakay sa ilang kahidlaw? O makaangkon nag kahigayonan pagtuki sa mas dakong hulagway lapas sa tumoy sa ilang mga ilong?

Mao nay gusto namong mahibaw-an sa eksperimentong gihimo sa DYAB Abante Bisaya ug DB Edwards, ang kompaniya nga nagtanyag og voice over Internet protocol (VOIP) pinaagi sa www.intouch.com.ph. Gitaoran nilag E800 web phone ang among web log (http://dyab-cebu.blogspot.com ) nga kon i-click sa OFW sa bisan asang bahin sa kalibotan mobagting ang telepono sa DYAB ug makahimo na sila pakig-istorya sa ilang mga kapamilya, magpalaban sa nagkalainlaing mga ahensiya, moasoy sa ilang sugilanon, malipayon man o masulub-on, o mosangyaw og mga pagtulun-an para sa nasud ug katawhan.

* * *

Email: [email protected]