Terorismo sa RP

Ang CODAL (Counsels for the Defense of Liberties) nakugang sa ilang pagtuon sa mga probisyon sa anti-terrorism bill nga giaprobahan na sa duha ka komitiba sa House of Representatives. Nipasidaan ang CODAL nga kon ipamugos gyod nilang Kongresista Antonio Cuenco ug kaubanan ang kuwestiyonableng mga probisyon, mahimong gamiton ni Pres. Arroyo ang balaodnon aron pagdugmok sa tanang lehitimong mga protesta batok sa iyang administrasyon.

Ang pasiunang resulta sa pagtuon sa CODAL nga gipatik sa Philippine Center for Investigative Journalism nibisto nga ang Section 4 sama rang nideklarar nga terorismo ang EDSA 1 ug 2, kay nakamugna og "serious interference of an essential service" tungod sa pagbabag sa trapiko sa EDSA ug sa operasyon sa Kampo Krame ug Kampo Aguinaldo sud sa upat ka adlaw, ug gitumong pagpugos sa pagpalagpot sa mga administrasyon nilang Ferdinand Marcos ug Joseph Estrada.

* * *

Nakit-an sa CODAL nga usa sa mga implikasyon mao nga ang tanang nangapil sa EDSA 1 sa 1986 ug EDSA 2 sa 2001-nga naglakip nilang Pres. Arroyo, DILG Secretary Angelo Reyes, House Speaker Jose de Venecia, Senador Aquilino Pimentel ug Chief Justice Hilario Davide Jr.-mga terorista ug kapahamtangan og silot nga kamatayon. Laing implikasyon mao nga ang tanang mangapil sa mga protesta nga nag-awhag sa pagpalagpot ni Pres. Arroyo sa Malakanyang mahimo sang lumpungon pagkiha isip mga terorista ug silotan og kamatayon-apil nang mga kongresista nga nangamahan sa balaodnon, silang Roilo Golez, Ace Barbers, Dudut Jaworski ug Imee Marcos. Matod sa CODAL bisan kon way aktuwal nga kagubot nga moulbo sa mga protesta sa kadalanan, kasilotan gihapon ang mga mangapil tungod sa "hulga" sa kaguliyang.

* * *

Tungod sa pag-ila nga terorismo ang "serious interference of an essential service" ug "coercion" sa gobyerno pagtuman sa awhag sa mga demonstrador, mahimong makonbikto isip mga terorista ug mapriso sa tibuok kinabuhi ang mga mangapil sa mosunod nga mga protesta nga giila ug gipanalipdan sa konstitusyon ug sa kalibotanong mga kauyonan sa United Nations isip batakang panginahanglan sa pagpatigbabaw sa civil ug political rights: •Transport strike; •Welga sa mga trabahante; ug •Walkout sa mga tinun-an o mga magtutudlo.

* * *

Di kay kana ra. Segun sa CODAL labawng di masabtan ang Subsection 2 nga nagsilot sa "threatening serious risk to health or safety." Sa ato pa, matod sa CODAL, ang mga doktor ug nurses sa ospital nga magplano sa pagwelga tungod sa panaugdaog sa management mahimo nang posasan bisan di pa makasugod sa ilang protesta.

Ilang silot? Mahimo silang prisuhon sud sa tulo ka adlaw bisan way kasong ipasaka sa korte ug busa di mahimong makapiyansa para sa ilang temporaryong kagawasan. Kay ilhon nang terorismo bisan ang paghulga pa lang sa pagwelga.

Email: [email protected]