EDITORYAL - Ang mga krimen nga nahimo sa duha ka frats

Usa ka dakong opisyal sa Alpha Kappa Rho (Akrho) dihang giinterbiyu sa radyo kalabot sa pagpusil patay sa usa ka sakop sa Tau Gamma Phi nga gituohang paryente sa hepe sa Philippine National Police, nagkanayon nga usa ra kadto ka "isolated incident."

"Isolated incident?"

Ang rekord sa Homicide Section sa kapolisan dinhi sa siyudad sa Sugbo mipakita nga aduna nay 43 ka mga kasong kriminal diin nalambigit ang Akrho ug Tau Gamma.

Base sa maong rekord, adunay 13 ka kasong murder, tulo ka homicide ug ang uban mga frustrated homicide ug attempted murder. Kini matud pa sa kapolisan binuhatan sa pipila ka mga miyembro sa Akrho ug Tau Gamma.

Ang mga biktima sa maong mga krimen apil sab ang pipila ka mga way labot sa panag-away ning duha ka fraternity kinsa nangaangin lang.

Busa usa ka dakong paglibuglibog kun pag-mislead sa publiko ang giingon sa dakodaku sa Akrho nga ang nahitabo sa paryente ni PNP Chief Lomibao usa lamang ka isolated incident.

Ug base usab sa rekord nga anaa sa Homicide Section gikinahanglan na gyud nga molihok ang kapolisan aron ang gidaghanon sa krimen nga nahimo ning duha ka fraternity dili na mousbaw. Ug gukdon gayud kadtong mga nalambigit sa maong mga krimen.

Nailhan sa kapolisan ang mga notoryus nga sakop sa Akhro ug Tau Gamma kinsa nalambigit sa daghang dugoong panghitabo.