Angay'ng dunay usa ka fact-finding team nga mugnaon si mayor Osmeña aron maoy motutok niining maong isyu. Dili maayong palabyon kining maong kahigayonan nga duna na'y giya nga kini kahatagan og sulbad.
Si ginang Ophelia Alcordo, ang manager sa Cebu Security Agency, maoy magsilbi nga "ice breaker" human niya gibutyag nga bisan human na siya makabayad sa tukma niyang bayranan sa business permit sa City Hall, apan may nangayo gihapon aron mapadali ang pagpagawas sa dukomento.
Hagiton usab nato si ginang Alcordo nga kon tinood man ang iyang gibutyag nga biktima lang siya ug wala siya'y kalambigitan sa paghupot og mini nga business permit, kinahanglang pasakaan nimo og kaso kadtong imong kanhi kawani nga si Nida Dina Benolirao.
Ang pamahayag ni Alcordo nga si Benolirao, kinsa iyang office staff hangtud sa miaging Hulyo, maoy iyang gisugo nga mobayad sa business permit sa City Hall kaniadtong Enero 20 sa kantidad nga P7,875.
May resibo gayod si Alcordo nga nahuptan nga nakabayad siya niining maong kantidad didto sa City Hall, apan si Benolirao kuno nangayo pa g'yod og dugang P25,000 kay mao kuno ang gipangayo sa kawani sa City Hall aron mapadali ang pag-release sa business permit.
Mao kadto nga ang business permit napalusot kuno dayon pagka hapon kaniadtong Enero 20. Apan wala mahibaw-i ni Alcordo nga ang business permit nga gihatag kaniya ni Benolirao, usa diay ka "fake."
Angayan nga pasakaan og kaso ni Alcordo si Benolirao. Kini aron nga mapugos kini pagtug-an og kinsa ang naghatag kaniya sa maong dukomento nga fake - kana kon dili siya ra ang nagbuhat-buhat ani ug nga gibulsa ra niya ang P25,000.
Dili malikayan nga magduda kita nga si Benolirao apil nga nakabahin sa gibayad nga P25,000 gikan ni Alcordo. Apan nganong mibayad man sab si Alcordo sa maong kantidad?
Kon maghulma si mayor Osmeña og usa ka fact-finding team, motulin ang imbistigasyon kay sa isalig ra niya sa mga kawani sa city treasurer's office nga daghan og mga trabaho.
Mobukal g'yod ang akong dugo nga maghuna-huna niining mga tawo nga mobulsa sa kwarta nga para unta sa kagamhanan. Tiaw mo, gawas kang Alcordo daghan pa nga mga balay-patigayon nga naghupot og mga "fake" nga business permit.
Angay usab nga dayonon ni mayor Osmeña ang hulga niya nga pasakaan og kaso nga kriminal kadtong mga tag-iya og balay-patigayon nga namatud-an nga "fake."
Kini aron mapugos sila nga motug-an kinsa ang ilang kontak nga kawani diha sa City Hall nga posible nga nalambigit niining sindikato nga nakapaut-ot sa kinitaan sa dakbayan.
Sama adtong sakop sa Liquor Licensing Commission sa City Hall nga gipalagpot sa trabaho kay pareho ra usab diay og balhibo. Dili tukma mayor Osmeña nga igo lang natong taktakon sa trabaho ang mamatud-an nga sad-an.
Pasakaan nato sila og kaso nga paglapas sa Republic Act 3019 kon anti-graft and corrupt practices act.