Labing ulahing biktima mao ang giingong apo sa hepe sa Philippine National Police nga si Director Arturo Lomibao.
Ang maong biktima kinsa giila sa kapolisan nga si Kyle Lomibao Capsa, 23, sakop sa Tau Gamma Phi. Gisung kini sa usa ka taga Alpha Kappa Rho kun Akrho ug gipusil patay sud sa iyang panimalay.
Wa na ba gyuy makapaundang niining binuang ug pangabusar ning maong badlongong sakop sa duha ka fraternity?
Bisan ang mga opisyal sa dakbayan wala makapakitag higpit nga aksyon batok niining mga killer nga nagpakaaron-ingnon nga fraternity members.
Ang tinahud nga Arsobispo sa Sugbo nga si Ricardo Cardinal Vidal makapila nagbalik-balik sa iyang awhag ngadtos mga kadagkuan sa duha ka frat sa paghimog mga lakang nga makapahunong na niining mga dugoong buhat sa ilang mga sakop. Apan midepensa hinuon sa pag-ingon nga walay dautang nahimo ang ilang mga miyembro.
Si Cebu Provincial Police Office Director Vicente Loot mihulga nang iyang ideklarar nga 'criminal groups" kining Akrho ug Tau Gamma kun magpadayon ang ilang pagpangabuso apan wala kini makahatag og kahadlok kanila kay nganong nagpadayon man gihapon ang ilang pagpinatyanay.
Karon duna nay rason si Director Loot sa pagduso sa iyang hulga. Segurado kami nga makakuhag dakong suporta si Ginong Loot gikan sa mayoriya sa mga sakop sa atong katilingban nga sa dugay nang panahon naglagot sa mga pagpangabuso niining mga badlongong fratmen.