DEPW, hoy gising!

Pwerteng daghana nga panimalay sa upat ka barangay diha sa Lorega-San Miguel, Zapatera, T. Padilla ug Tejero ang gipangbahaan ug gilonopan kaniadtong Lunes sa hapon.

Kini bisan nga hinay ra gani ang uwan. Dili ba ang angay'ng basulon nato niini mao ang kadagkoan sa Department of Engineering and Public Works (DEPW) kay wala nila palawmi ang sapa?

Naluoy kaayo ko nga nagtan-aw sa mga tag-iya sa lainlaing kabalayan nga gipangbahaan nga gikapoy intawon sa paghinabwa sa baga ug pilit kaayong lapok nga misulod sa ilang kabalayan.

Sayonan ka? Kining lapok nga mouban sa tubig, pwerteng pinoha og danglog kini kaaayo kon imong matumban.

Pagka gabii g'yod, duna intawo'y hamtong na nga lalaki nga hinay kaayong naglakaw sa usa ka dalan-dalan sa sitio Kaimito, Lorega-San Miguel, mikalit lang sa pagkalukapa kay nakatamak sa maong lapok.

Kanus-a pa man kamo makadungog diha sa DEPW sa mga yangu-ngo sa katawhan nga unta palawman na ninyo ang sapa nga milagbas sa dalan Echavez ug nagsubay sa Sikatuna paingon na sa T. Padilla?

Nasayod kami nga daghan kamo og mga trabaho, apan syaro na man sab og sukad kaniadto pa wala g'yod kamo makalugar?

Ako maoy kanunay nga sumbongan sa problema sa mga lumulopyo aning mga lugara kay anaa man ko magpuyo sa barangay Lorega-San Miguel.

Palihug kuno mga opisyal sa DEPW, tagda ninyo ang problema sa maong mga lumulopyo. Gisuta g'yod nako kini nga ang kamabaw sa sapa usa nga rason nga ang tubig dali ra kaayong mosuyla og moawas sa sapa.

* * *

Kini bitaw'ng mga tawo nga kusog kaayong mangabuso og kabataan, ilabi na kadtong mga rapist, angay g'yod nga pahamtangan og labing bug-at nga silot. Dili sila angay nga pasanayon dinhi sa kalibutan.

Sama aning usa ka Jerwin Todorios nga lumulopyo sa sitio Bangkal, barangay Guba, usa ka bukid nga dapit sa dakbayan.

Gipasakaan og kasong pagpanglugos si Todorios. Abi ninyo og pila ang edad sa giingon nga iyang giabosohan? Wala pa intawon ma tuig.

Kon tinuod man ang pamahayag sa bata nga mireklamo batok niya, dili angay nga kini si Todorios hatagan nato bisan gamay nga kalooy.

Dinhing bahina nga wala ko modayeg ni Presidente Arroyo ug sa uban nga misupak nga ipatuman ang maximum penalty nga mao ang kamatayon ubos sa Republic Act 7659.

Unsa kaha kon kining mga tawhana mao mismo ang makasuway nga ang ilang anak maoy abusohan? Makapaabot kaha kita nga moingon sila nga dili lang patyon pinaagi sa lethal injection ang mga rapists?

* * *

Nagkatawa ko nga nagbasa sa complaint nga gipasaka sa Social Security System batok sa usa ka gamay'ng magpapatigayon nga taga Naga.

Ang gipasakaan og kaso tungod sa kapakyas pag-remit sa SSS premiums sa iyang mga trabahante mao ang usa ka Rosela Canque, kinsa nag-operate og tindahan sa barangay Inuboran.

Kining ako wala magpasabot nga nasuko ko nga gipasakaan og kaso si Canque, apan nakapangutana lang ko nganong wala ma'y mga dagkong tag-iya og patigayon dinhi sa Sugbo nga napasakaan og kaso sa SSS?

Maghuwat ra ba diay mo og reklamo? Mas maayo tingali nga magsukit-sukit kamo sa mga kawani kon ang gi-deduct kanila, tukma ba nga gi-remit sa SSS?

Sagad nila buhaton, pasubrahan ang kobrahon aron ang mga employers gamay na lang og pun-anan.