Tips sa TF hunter

Karong panahona kanus-a midagsang pag-ayo ang mga illegal recruiter, mipahimangno ang Presidential Anti-Illegal Recruitment Task Force nga gipangulohan ni Director Reynaldo Jaylo nga magbantay gayod ang tanan aron dili masulod sa laang sa mangingilad nga mga recruiter.

Arong pagseguro nga dili kamo malingla sa modus operandi sa mga illegal recruiter, aniay pipila ka tips nga gihatag ang TF Hunter ug Philippine Overseas Employment Administration (POEA) aron makalikay kamo sa mapahimuslanong mga tawo.

1. Ayaw pag-apply sa bisan unsang recruitment agencies nga dili lisensiyado sa POEA.

2. Ayaw pagpakig-deal bisan sa lisensiyadong mga ahensiya kon wala silay ikapakita nganha kanimo nga job orders.

3. Ayaw paghimog bisang unsang transaksiyon ngadto ni bisan kinsang tawo nga dili awtorisado isip representante sa usa ka lisensiyadong agency.

4. Ayaw paghimog bisan unsang transaksiyon sa laing lugar gawas lang sa registered address sa ahensiya nga giaplayan o buot aplayan. Kon sa inyong probinsiya gipahigayon ang recruitment, angay silang pangitaan og provincial recruitment authority. Kon wala silay ikapakitang PRA, dili maayong mosalig kamo sa maong mga recruiter.

5. Ayaw pagbayad og placement fee nga sobra sa gilatid sa balaod. Ang placement fee kinahanglang tugbang lang sa usa ka buwan nga suweldo sa aplikante, apil an ang documentation ug processing fee. Kon sobra ang pangayoon, wala na kana mahasubay sa gilatid sa balaod ug busa, illegal kini.

6. Ayaw pagbayad og placement fee kon wala ikaw ing gikuptan nga employment contract ug offiical receipt.

7. Dili gayod angay nga motuo gilayon sa mga ads ug brochures nga nag-ingon nga kinahanglan nga ang inyong tubag ipaagi sa usa ka Post Office (P.O.) Box number, ilabi na gayod kon ipasukip sa inyong sulat ang bayad sa processing sa inyong mga papeles.

8. Ayaw pagpakig-deal sa dakong kasayon sa mga training centers ug travel agencies nga mopasalig nganha kaninyo og overseas employment.

9. Ayaw pagsugot nga usa ka tourist visa ang ihatag kaninyo. Dako kanang paltos sa panarbaho kon atua na kamo sa gawas sa nasod.

10. Ayaw paghimog transaksiyon ngadto sa mga fixers tungod kay mao kana ang sagad nga hinungdan sa pagkailad.

* * *

Sumbong ug reklamo? Text sa 0910-8105522)