Padad-an ko niyag 20 sentabo aron ipalit og isda, lamas, suka, asin, ug itlog. Mao ni ang among mapalit sa 20 sentabo sa among panahon.
Mao nga karon, maglibog ko inig-ingon nila nga we're better off karon kay sa 50 years ago. Karon, maglibog kag unsay imong mapalit sa 100 ka peso.
Karon mahal na ang tanan. Sa sunod mong palit og bugas, lain na ang presyo. Sa una namong pagpalit sa naandan namong bugas, P1,160 pa ang sako. Katapusan namong pagpalit 1,180 na. Karon, sa paggula niining lindog, lagmit P2,000 na ang sako.
Unya, ang gasolina, kada-semana mosaka ang presyo. Lagmit karon, ang imong P100.00 usa na lang ka litro. Kami sa balay, nagsugod nag sakay og PUJ, ug gamiton na lang ang kotse sa importante kaayong lakaw. Usahay mag-taxi (nga utro sang mahal), o mag-v-hire (kansang mga driver abusado kaayo).
Ang saging nga unta, makapalig-on sa lawas, tag-P3.50 na ang buok sa bangan, kon dagko kaayo, P4 o P5 na ang usa. Mao sad ang mga utanon, labina ang isda nga usahay mas mahal pa kay sa karne.
Mag-unsa na man lang ta ini, Dro? In my case, for instance, senior citizen na, retired na, sa ato pa, waa nay sweldo. Hangtod karon, waa pa ko mahibawo kon pilay akong pension. Lagmit kuwang pa, sa gasolina lang daan.
It seems ra ba nga waa kitay nakitang solusyon in the near future. Unya, di ta kapasangil sa gobyerno kay masuko sila. Ambut kinsay atong pasanginlan ini, Dro! Di ra ba sila katubag kay busy kaayo sa politika. Ug samtang nagkagidlay ta, naka-afford pa silag nag-junket sa Amerika.
Unsa na ni, Dro?