EDITORYAL - Gahum sa Ginoo mao ray solusyon sa problema

Human sa iyang pagsalmot sa pipila ka mga street rally didto sa Manila, si Bishop Eddie Villanueva sa Jesus is Lord Church Worldwide mipagawas ning mosunod nga pamahayag:

"The answer to our current problems is not people's power but God's power...Only prayers can solve the country's socio-political problems."

Klarong makaamgo na si Brother Eddie nga kining mga rally sa kadalanan batok ni Presidente Arroyo dili maoy solusyon sa mga suliran nga giatubang karon sa nasud kundili ang pag-ampo.

Suma pang Brother Eddie ang ispirituhanong gahum mas gamhanan kay sa tanang gahum sa politika.

Busa sa ilang selebrasyon sa ika-27 nga anibersaryo sa JIl karong adlawa gitinguha sa maong pundok nga wala gayoy bulok sa politika nga masinati ang katawhan.

Matud ni Brother Eddie walay politiko nga ilang giimbitar sa maong selebrasyon. Ang ilang gipangimbitar mao ang mga lider sa Simbahang Katoliko, nagkadaiyang pundok sa Born Again Christians, ug ubang prominenteng tawo.

Apan sa balita nga gipublikar sa The FREEMAN kagahapon si Susan Roces, ang biyuda ni Fernando Poe Jr. ug usa sa mga lider sa political opposition karon, gikatakdang mosalmot sa gihisgutang kalihukan sa JIL.

Imbitado ba si Ginang Roces-Poe? kun imbitado, nganong giimbitar man lagi nga wa man kahay bulok sa politika ang maong kalihukan? Kun wa imbitaha, nganong motambong man siya kinsa nalambigit nag maayo ning panahona sa mga politikanhong kalihukan?

Atong panid-an kun tuod ba gyong walay political color ang JIL anniversary celebration karong adlawa.