Midagsang pag-ayo ang mga isnatser

Dul-an o kapin na ba kaha hinuon sa usa ka gatos ka badlongon sa katilingban ang gituohang giluthang sa mga vigilantes. Apan kining mga isnatser nga midagsang karon sa dakbayan sa Sugbo ingon sa wala mahadlok sa maong mga vigilantes.

Niadtong miaging pipila ka adlaw, gibaha sa daghang mga text ang akong cellphone. Kadaghanan mga sumbong mahitungod sa ilang pagkabiktima sa mga isnatser. Ang kadaghanan sa mga biktima mga estudyante sa lainlaing mga unibersidad dinhi sa atong dakbayan. Aduna usay uban nga mga nagtrabaho na diin magabhian sila sa pagpauli sa tagsatagsa nila ka pinuy-anan.

Ang kasagaran sa mga pagpangbiktima mahitabo sa panahon nga mga alas otso na sa kagabhion. Simple lang ang estilo sa modus operandi sa mga isnatser. Inigkanaog sa biktima sa PUJ nga ilang sakyan, diha nianang higayona nga labnihon ang ilang cellphone, relo, bag ug uban pa.

Human makuha ang ilang tuyo, modiretso kinig sibat pahilayo. Usahay, mosakay pa ang isnatser sa dyip nga gikanaogan sa biktima sa iyang pagsibat. (Dili kaha kakunsabo ang mga driver niining maong modus? Nangutana lang ko, ha).

Ang nakapait pa gyod kay usahay anha na mismo sa atubangan o tugkaran sa balay sa biktima makuha sa suspek ang iyang cellphone. Mora bag gisundan o kaha gihulatan sa suspek ang iyang paghiabot.

Aduna usay mga panghitabo diin ang mga isnatser nagsakay og motorsiklo mao nga dali ra silang makasibat ug lisod nga madakpan sa kapolisan. Sa laing pagkasulti, maglaway lang ang mga polis kanila.

Para nako, gaan ra kining maong mga kaso sa krimen apan kinahanglang mahatagan kinig dakong pagtagad sa kapolisan. Ang mga isnatser makahatag man god og dakong puwerhisyo ngadto sa mabuot nga mga lungsoranon. Kasagaran sa ilang mabiktima aduna gayoy tuyo-- aduna pa kahay paliton -- sa ilang paglaroylaroy sa siyudad.

Apan tungod lagi kay nabiktima sa snatching, dili na mapalit ang gusto nilang paliton. Mopauli na lang intawon sila nga magminghoy. Haskang paita. Busa, labing maayo gayod nga mahatagan og proteksiyon ang katawhan nga maglakaw sa kadalanan sa dakbayan sa Sugbo batok sa mga isnatser.

* * *

Sumbong ug reklamo? Text sa 0910-8105522)