Kadudahan na kaayo

Nagduda na gyud ko niining mga bangko nganong dili gyud mokooperar sa kapolisan pagpatuman sa higpit nga seguridad aron paglikay sa mga tulis.

Ang East West Bank nga gitulis makaduha na niining tuiga maayong bundakan sa tanang pagbasol tungod sa kagahi sa ulo sa tagdumala niini.

Tiaw mo kanang bisan nakaagum na og pagpanulis niadtong Enero, usa lang gihapon ka guwardiya ang gibutang.

Kapila na pahimangnoi sa kapolisan nga magbutang og security devices sama sa video camera ug mga alarm system nga konektado sa mga presinto sa kapolisan. Apan wala gyuy imik ang tagdumala sa East West, usa ka sinyal nga ganahan kaayong i-expose ang bangko sa risgo.

Kun gahi gyud kining mga bangko, ang kagamhanan sa dakbayan sa Sugbo, miyentras wala pay balaod ang nasud, mahimong mopanday og ordinansa nga magpugos sa mga establisamento, ilabi na ang mga bangko nga magbaton og mga security devices.

Nasayod man tingale ang mga kongresista nga daghan nang mga bangko ang gitulis, dili lang dinhi sa Sugbo, maayong mopanday sila og balaod aron pugson ang mga tagdumala sa mga establisamento nga magbaton og tukmang programa sa seguridad.

Kun himuon kining rekisito, mahimo kaayo kini.

* * *

CIP FIRE. Kumusta naman ang imbestigasyon sa nasunog nga bodega sa Bureau of Customs didto sa Cebu International Port (CIP)?

Mura og gitago-tago naman sa mga hingtungdang ahensiya ang resulta sa imbestigasyon.

Diha man kadtoy gipadala nga mga special investigator aron pagtino kun arson ba gyud ang hinungdan sa pag-ulbo sa kalayo nga misunog sa bodega ug sa mga kargamento nga gitaguan sa sulod niini.

Mikabat sa kapin sa P200 milyones ang balor sa mga kargamento nga naapil pagkasunog. Awhagon nato si Cebu Customs District Collector Ma. Lourdes Mangaoang sa pag-update sa publiko unsa na ang gidangatan sa imbestigasyon sa maong insidente sa sunog.

* * *

REKLAMO. May mireklamo kanato kagahapon batok nianang Christian school diha sa Mabolo nga nangangkong accredited sa DepEd unya grabeng makapaningil og tuition sa mga tinun-an.

Dili lang kay kana ra. Dili patas ang pagpaningil nila sa tuition fee. Dihay ginikanan nga gipabayad og 1,300 US dolyares alang sa iyang anak nga nagtungha sa maong pribadong tunghaan.

Ang nakaparat lang kay wala gyud isyuhi og resibo sa tagdumala sa tunghaan kay wala pa kuno ma-clear ang cheke. Apan sa dihang gisusi sa ginikanan didto sa Amerika, ang bangko mimatuod nga na-encash na diay ang cheke. Panikas!

Ang maong tunghaan kanhi fish bodega. Wala kini building permit, walay klarong academic program, walay klarong IT program, walay klarong fire exit ug klarong fire hazard ang edipisyo, ug daghan og misrepresentation.

Ang tagdumala dili gusto nga adunay Parent-Teachers Association sa tunghaan.

Unsa man kini nga eskuwelahan?

Dili lang una nato ibutyag ang ngalan hangtod ma-substantiate sa mga ginikanan ang ilang reklamo ngadto sa DepEd ug ngadto sa mga sakop sa media.