Uwahi nang tanan

Si Dr. Victor D. Villaganas, bise presidente sa Cebu State College of Science and Technology, gihulagway nga, sama ni CSCST President Jose Sal Tan, otro sang may anting-anting. Gipasanginlan si Villaganas nga nag-eskuyla og abogasiya sa samang higayon nga nagkuha sa iyang doctorate sa philosophy ug nagtudlo og subjects sa graduate programs. Nagpakabanang mga kawani sa CSCST nangutana kon naserbisyohan pa ba ni Villaganas ang iyang mga gimbuhaton isip bise presidente tungod sa daghan niyang mga raket. Nagduda sila nga, sama ni Tan, si Villaganas nagpahimus lang sa mga buslot sa sistema sa CSCST aron pagpalambo sa iyang pribadong mga interes, bahala nang eskuylahan ug mga tinun-an.

* * *

Si Villaganas nitawag nako sa telepono aron pagpanghimakak sa mga pasangil batok niya:

Nakuha niyang iyang doctorate of education (educational management) sa Southwestern University (SWU) niadtong 1987; ug

Ni-eskuyla siya og abogasiya sa SWU gihapon sugod niadtong 1991, o upat ka tuig human nakuha ang iyang Ed. D., ug natapos siya niadtong 2003 (wa pa siya kakuha sa bar examination nga maoy makapahimo niyang hingpit nga abogado).

Niinsistir sab siya nga ang iyang pagtudlo sa subjects sa graduate programs wa mosukwahi sa iyang pag-eskuyla sa SWU. Wa hinuon siya katarung pagpasabot kon nakatuman pa ba sa iyang dagkong mga gimbuhaton ug responsibilidad isip ikaduhang labing taas nga opisyal sa CSCST sa mga oras nga nagtudlo siya sa graduate programs ug sa mga oras nga nag-eskuyla siya sa SWU.

* * *

Sa samang higayon, niinsistir si Villaganas nga lehitimo ang pagradwar nilang labing dagkong mga opisyal sa CSCST sa Associate in Industrial Engineering sa Carmen Campus niadtong Marso 3, 2003. Matod niya si Dr. Rolando H. Arpilleda nga maoy nagduma sa ilang klase nipatuman og sistema sa pagtudlo nga di sila kinahanglang motunga sa ilang klase kada adlaw. (Si Arpilleda gipasanginlan nga ni-gradwar sab uban nilang Tan, Villaganas ug sa uban niyang mga tinun-an sa kataposan sa semestre.)

Gihatagan sab kong Villaganas og kopya pinaagi sa fax sa memorandum ni Tan nga nagsugo sa paghunong pagbayad sa makabungog nga honorarium para sa labing dagkong mga opisyal sa CSCST. Giluwatan ni Tan ang memorandum human niya nadawat ang suwat ni Director Carmela Fernan sa Dept. of Budget and Management nga nagpahinumdom nga ilegal ang padayon nilang pagkobra sa honorarium.

Nganong karon na man lang motahud silang Tan, Villaganas ug kaubanan sa DBM Circular 2003-2005? Nga dugay na man ning gikutlo sa Commission on Audit sa pag-disallow sa makabungog nilang honorarium? Tungod ba kay bisan sa tanan nilang pagsuway paglusot, nagpabiling determinado ang nagpakabanang mga magtutudlo ug mga tinun-an sa CSCST nga gawas nga mahunong ang anomaliya kinahanglang kasilotan gyong mga mapahimuslanon?

* * *

[email protected]