Manguwenta

Ang Dios Miingon... Pamalandong matag Domingo
Septiyembre 25, 2005; Ikakawhaag-unom nga Domingo sulod sa tuig
Mga Pagbasa: Ez. 18:25-28/Fil. 2:1-11/Mt. 21:28-32

Kinaiya na gyud natong mga tawo ang magkwenta. Pangwenta nga magtukmod sa uban sa kapasikaran nga sila wala makabuhat sa angayang buhaton. Mao nga usahay mapugos na lang pagpatukod og tulay bisan walay sapa ang usa ka mayor aron dili mabuyboyan og makwestiyon ang iyang nilingkoran nga posisyon.

Ingon ini usab ang hinungdan kon nganong nasulti ni Jesus kining maong sambingay sa duha ka mga anak lalaki ngadto sa mga Pariseo og mga Kadagkoan sa Lungsod. Nagdahom man gud ni sila (mga pariseo og mga kadagkoan) nga paigo na ang pagkat-on sa Balaod. Intellectually, sayud na sila niini. Apan wala kini magpasabot nga nahuptan pud nila ang usa ka tinuoray nga paghinulsol og pagpaubos, sa kapasikaran nga dunay pagka-self-righteous kining mga tawhana. Mao nga dili ikatingala nganong ubos ang ilang pagtan-aw sa mga Kobrador sa Buhis og sa mga Dautang Babaye. Sanglit ang konteksto ning atong ebanghelyo nihulagway man sa Sibling Rivalry tali sa mga "Self-Righteous" mga Pariseo batok sa mga "Sinalikway" nga Kobrador sa Buhis, og mga Dautang Babaye nga naghinulsol og naningkamot nga matul-id ang pagkinabuhi.

Hanas kaayo kita kon pinahiray lang og buling ang hisgotan. May pagka-Pariseo ang kadaghanan nato. Nagtuo lang gyud ta nga kanunay tang husto og sayop ang uban. Ug ang mas grabe pa gyud: Masina ta kon ang uban nagbag-o na sa ilang pagkinabuhi ingon nga Kristohanon. Ang pangutana mao: Asa may maayo, Ang Tarong nga nahimong Dautan o ang Dautan nga nahimong Maayo? Asa man nimo mabuyon ang imong kaugalingon sa atong ebanghelyo karon: "Sa maguwang ba, o sa Manghod?