Nagpakatawa mo da!

Bug-at ra kuno kaayo ang silot nga unom ka buwan nga pagsuspenso sa katungdanan nga gipahamtang sa Korte Suprema batok ni judge Rosabella Tormis sa Municipal Trial Court in Cities (MTCC) dinhi sa dakbayan sa Sugbo.

Ang kadagkoan sa Integrated Bar of the Philippines sa dakbayan sa Sugbo misugyot nga unta kon ang mahimong kalapasan sa usa ka huwes diha ra sa ilang "judicial judgment" og wala lang maglambigit og graft and corruption, gagmay lang unta nga silot.

Buyno, dili nato lantugion ang mga opisyal sa IBP, ilabi na nga dili kita usa ka abogado. Matag tawo dunay katungod sa iyang baruganan ug angay nato kini nga respitohan.

Apan ang baruganan god sa Korte Suprema sa kaso ni Tormis mao nga makadaghan na siya nasilotan sa mga judicial judgment. Ang rekord mao nga sa walo ka kaso nga gipasaka batok kaniya didto sa Supreme Court, nakonbikto siya sa lima ka kaso.

Gitataw gayod sa Korte Suprema nga isip mga huwes, suheto gayod sila sa mga balaod ug mga lagda nga gilatud sa Rules of Court ingon man sa mga hukom sa Korte Suprema aron maoy ilang basihan pagpakanaug og hukom.

Si judge Tormis, presiding judge sa MTCC-Cebu City branch-4, nakonbikto kay midawat man siya personal sa gibayad nga pyansa sa usa ka akusado.

Gilatid man god sa Rule 114, section 17 sa Rules of Criminal Procedures nga ang bayad sa pyansa adto ra g'yod sa mga municipal, city ug provincial treasurer. Kon ang mga clerk of courts gihatagan og katungod sa pagdawat niini, aw adto sa clerk of court.

Wala gayod ibutang sa lagda nga ang mga huwes makadawat og pyansa, ilabi na nga gihimo kini alas siyete na sa gabii matud ni judge Tormis.

Ang akusado nga bansagon og Domugho gidakop sa usa ka polis alas 8:45 sa gabii kaniadtong Hulyo 2, 2003. Human siya madakpi, direkta nga gidala si Domugho ngadto sa police station ug pagka alas diyes sa gabii, nabuhian siya.

Ang rason ni judge Tormis nga si Domugho, ang iyang abogado ug ang polis nga nagdakop kaniya, miadto sa hukmanan og mibutang kini og pyansa.

Dinhing bahina nga wala motoo ang Korte Suprema. Mibarog gayod ang kapolisan nga human madakpi si Domugho, wala gayod kini moadto sa korte aron pagpyansa.

Dunay laing palusot si judge Tormis. Sa wala pa kuno kini madakpi, mga alas siyete sa gabii, miadto kuno kini sa iyang sala og mipyansa. Motoo mo? Kining maong rason ni judge Tormis gikataw-an lang sa mga justices nga nadistino sa Supreme Court first division.

Apan bisan pa og ibutang nato nga miadto si Domugho sa sala ni judge Tormis og mibayad og pyansa, igo gihapon si judge Tormis kay wala man tuguti ang mga huwes nga maoy modawat sa bayad sa pyansa.

Ang ila mao ra ang pag-aprobar sa paghatag og pyansa og ang pag-isyu og release order. Sayop usab ang usa ka opisyal sa IBP nga miingon nga mideritso lang ang Korte Suprema pagpahamtang og silot ni Tormis.

Sa makadaghan nga higayon, si Tormis gipahimangnoan sa Korte Suprema nga magtinarong kay ang paghimo og mga sayop sa usa ka huwes, makaaghat sa katawhan nga dili na motahud sa hukmanan.

Kinahanglan lagi nga ang mga huwes, may banggiitan pa sa mga yanong abogado. Kon mahibaw-an sa mga abogado nga kuwang og kinaadman ang usa ka huwes, magkatawa ra kini apan dili lang hinoon mohimo og mga insulto atol sa husay.