Postiso

Sugilanon kini sa usa ka Monghe. "Ang maong Monghe sa matag higayon siya makasala, moibot gilayon sa iyang ngipon diha mismo atubangan sa Santo Kristo agig penitensiya og timaan sa iyang Pagbasol. Tuod man, iya kining gibuhat. Madako o magamay ang sala. Hangtod usa ka adlaw niana, nadiskobrehan sa Monghe nga Nabungal na lang siya og nahurot ang tanan Niyang mga Ngipon, apan dili lang gihapon niya mapugngan ang kaugalingon diha sa pagpakasala. Mao nga miatubang siya karon sa Santo Kristo nga naghilak og nagkabungal lang ang agi. Wala lang damha ang Santo Kristo, mitingog nga tugob sa kalumo. Giisip ko ikaw'ng anak og dili ulipon. Kay ang Ulipon kon siya makasala, silotan man apan ikaw kay anak man, pasayloon lang gihapon. Mao bitaw nga ako karon nagbitay sa Krus tungod og alang kanimo. Mao bitaw nga ako nahimong tawo sama kanimo tungod sa dakong Gugma ko Kanimo. Dayon gitunol sa atong Ginoo ang Gamay'ng kahon ngadto sa monghe. Nindot kini og hapin. Tugob sa kalipay, gidawat sa Monghe ang kahon uban sa madagayaong pahiyom agig pasalamat sa Ginoo. Nadawat sa monghe ang usa ka paresan nga postiso!"

Pamalandong

Ang tawo usahay mas higpit pa kay sa Ginoo. Hinumdomi, higala nga ang tinuoray nga diwa sa pagbasol og paghinulsol wala magdepende sa mga penitensiya nga imong gihimo, kondili sa imong makanunayong pagpaningkamot nga ikaw makabarog human ka malubog sa lapok. Buot sa Dios nga ang tawo mausab og mahinlo kay dili siya malipay sa kamatayon sa usa ka tawong masalaypon.