Ang maong dump truck gipanag-iya ni konsehal Sesinando Flores Potencioso. Ang presidente sa kahugpongan sa mga mangoykuyay og bas ug graba nga si Rudy Gallarde.
Sa miaging buwan si gobernador Gwendolyn Garcia miluwat ug administrative order nga nagkanselar sa tanang permiso pagpanguha og bas ug graba sa maong lungsod tungod sa grabi nga mga kalampasan nga nahimo sa mga permitees.
Apan bisan pa sa maong kamanduan si Potencioso mibaliwala niini. Ang nakaapan kay ang mga opisyal sa lungsod dali nga midupa ug mipabuhi sa iyang sakyanan human makabayad ug usa ka libo ka pisos nga multa.
Unsay gibasihan sa mga opisyal sa Tuburan pagpamulta ni Potencioso? Kon dunay angayan nga momando pagpabuhi sa sakyanan ni Potencioso dili ang lungsod kon dili ang probinsiya tungod kay ang kamanduan nga nagkanselar sa tanang pirmiso gikan sa gobernador.
Gawas niini, provincial ordinance ang naglatid sa multa nga P1,000 ngadto sa P5,000 alang sa mga malapason sa lagda busa angayan nga ang probinsiya maoy mokolekta sa multa.
Way nahimo ang mayor nga si Rosemarie Suezo pagsanta sa maong mga illegal nga kalihukan diha mismo sa iyang nataran tungod kay lakip ang iyang pamilya apil sa maong mga tinunto.
Basi sa record sa Mines and Geo Sciences Bureau ug sa Provincial Environment and Natural Resources Office ang mga igsuon ni Suezo maoy nag-unang mga naghupot ug pirmiso pagpangoykoy og bas ug graba apan numero uno usab nga mga malapason sa lagda.
Ang nakapait kay ang gobyerno maoy naapeke sa ilang gihimo pinaagi sa wa pagbayad ug hustong buhis. Nasuta nga mga igsuon ni Suezo nga naglakip sa Mayor sa ilang silingang lungsod sa Tabuelan nga si Raul Gerona ug si kanhi Mayor Rex Gerona nangilad sa gobyerno pinaagi sa wa pag-issue og mga delivery receipts.
Ang wa nila pag-issue og delivery receipts maoy paagi paglipat sa gobyerno aron di silang kapaninglan sa hustong buhis. Human kanselaha sa probinsiya ang ilang mga pirmiso mihulga kuno sila nga mokiha sa provincial treasurer nga si Roy Salubre.
Apan sa dili pa sila makahimo sa pagpangharass sa ila ra usab nga ig-agaw mas maayo tingaling unhan ni Salubre og kiha ang maong mga opisyal tungod sa ilang gihimo.
fplanguido@yahoo.com