Laing modus sa illegal recruiters

Karong panahona, tungod lagi kay daghan man ang gustong makatrabaho sa gawas sa nasod, midagsang usab ang mga illegal recruiters nga walay laing tumong kondili ang makapamentaha ug makahatag og puwerhisyo sa ilang isigkaingon. Mao nga angay gayod mag-amping nga dili mailad kadtong buot mangaplay og trabaho sa abroad.

Ang Presidential Anti-Illegal Recruitment Task Force nga gipangulohan ni Director Reynaldo Jaylo nakadakop nag ubay-ubay nga mga illegal recruiters. Usa na niini ang recruitment agency nga gipanag-iya sa tulo ka suspek sa Quezon City, kinsa miingon nga "in good stand" ang ilang agency sa Philippine Overseas Employment Administration (POEA) ug may legal (kuno) nga basehan ang ilang pagpang-recruit og mga tawo nga patrabahoon sa abroad.

Mipasalig ang mga suspek ngadto sa ilang mga na-recruit nga mahatagan silag trabaho sa Europe pinaagi sa Dubai-based nga usa ka licensed recruitment broker. Gipangayoan nilang $550 hangtod sa $1,200 ang ilang mga na-recruit apan wala gayod kini nila mapasulod og trabaho.

Apan nangatarongan lang usab ang mga suspek nga wala sila modawat og kuwarta gikan sa mga aplikante kondili sa representante kuno sa Dubai-based nga licensed recruitment broker gihatag sa mga aplikante ang ilang bayad. Tan-awa ra, naglitolito na sila.

Matud pa hinuon ni Director Jaylo, ang pagpangayo og placement fee ginatugot basta dili lang molapas sa equivalent sa one month salary sa aplikante ang pangayoon sa agency.

Ang lain pang modus operandi nga gigamit sa mga illegal recruiters mao kining estilo sa paggamit nila sa ngalan sa usa ka lehitimong agency, pero front lang diay kini aron paglingla sa mga aplikante.

Ilang ipatuo ngadto sa mga aplikante nga nagbase sa gawas sa nasod ang maong agency ug nangita ang maong ahensiya og daghang mga trabahador. Ug sila (ang mga illegal recruiters) mao kunoy representante sa maong ehensiya dinhi sa Pilipinas. Maayong mobulatik kining mga tawhana maong daghan usab ang motuo kanila.

Pero sa higayon nga i-check ang nahisgotang kompaniya o ahensiya nga ilang gidala sa ilang pagpang-recruit, hayan nga wala na ang maong ahensiya o kompaniya. Sa laktod, non-existent na ang agency, giilad lang ang mga aplikante.

Busa pagbantay kamo niining maong estilo sa modus operandi sa mga recruiters nga illegal. Nasayod kong daghan karong panahona ang gustong maka-abroad. Dili kana daotan. Apan seguroa lamang nga dili mangingilad ang ahensiya nga inyong giaplayan.

* * *

Sumbong ug reklamo? Text sa 0910-8105522)